BAUKAU, STLTIMORLESTE.com – Ministeriu Edukasaun (ME) husu Prezidente Autoridade Munisipiu (PAM) sira atu kontrola orsamentu ba programa merenda eskolar no konsensoens eskolar neebe Governu aloka ba estudante sira.
Ministra Edukasaun, Dulce de Jesus Soares esplika, Edukasaun mak save ba dezenvolvimentu nuudar mekanizmu loke odamatan desentralizasaun ho kualidade ba futuru neebe diak liu no refere ba labarik hotu presiza hetan nivel Edukasaun diak kontribui ba dezenvolvimentu tuir idak-idak nia abilidade no potensialidade.
Maibe mosu tendensia foku ba programa merenda eskolar no konsensoens eskolares, bainhira koalia kona-ba merenda eskolar no konsensoens eskolares laos koalia kona-ba ezekusaun orsamentu, maibe nuudar kualidade servisu neebe fornese.
Tuir baze legal merenda eskolar atu garante nutrisaun minimu ba labarik estudante sira hotu iha nivel eskolar, tanba Timor Leste rejistu numeru ma-nutrisaun aas, nunee implementasaun programa merenda eskolar tenke tuir baze legal neebe estabelese ona, tanba programa merenda eskolar atu hatan ba ma-nutrisaun neebe iha Timor Leste.
“Husu Prezidente Autoridade sira labele haluha objetivu merenda eskolar, se Ministeriu Edukasaun harii infraestrutura luxu, kurikulum diak, profesores matenek, maibe kuandu estudante kabun la bosu sei labele tuir prosesu aprendizajen ho diak sei fo impaktu ba dezempenhu estudante,” hateten Ministra Dulce liu husi diskursu bainhira partisipa programa asistensia teknika ba servisu estrutura Autoridade Munisipal sira iha Baukau, Kinta (12/06/2025).
Governante nee sublina, kooperasaun servisu entre Ministeriu Edukasaun no Ministeriu Administrasaun Estatal orsamentu merenda eskolar desentraliza iha Autoridade Munisipal hahu tinan 2024 no orsamentu konsensoens eskolares desentraliza tan iha tinan 2025.
Nunee Ministeriu rua sei servisu hamutuk nafatin hodi garante ba programa rua refere lao ho diak fo benefisiu ba estudante sira iha nivel eskolar, tanba nee husu Autoridade Munisipal sira kria ajenda vizita eskola sira hodi haree kolokasaun orsamentu neebe Governu aloka ba kada eskola.
Tanba iha pratika dala barak osan konsensoens eskolares diretor sira uza ba kustu transporte, maibe laos hanesan nee, tanba kada estudante hetan US$ 2.00 kada fulan atu utiliza ba apoiu nesesidade estudante liga prosesu aprendizajen nian.
“Osan konsensoens eskolares atu uza ba apoiu estudante sira, kompleta materia didatikus, pratika atu halo mos repasoens kiik ruma se karik eskola nesesita, laos kustu ba profesores, hau husu PAM tau atensaun ita hamutuk jere orsamentu sira ho diak,” Ministra Dulce hakotu.
(tom)
