DILI, STLTIMORLESTE.com – Hahu husi Janeiru too Agostu tinan nee, Ministeriu Edukasaun (ME) identifika diploma nivel sekundariu jeral 4 husi ema neebe ba legaliza.
Liafuan nee haktuir husi Diretor Nasional Ensinu Sekundariu iha ME, Benjamin Gomes da Cruz Fernandes ba STL, Kinta (20/11/2025).
“Diploma falsu loron hira nee laiha, maibe tinan ida nee identifika diploma nibel sekundariu jeral falsu 4, agora ninia prosesu nee maka ami entrega ba iha parte inspeksaun jeral hodi bele haree halo prosesu. Ami detekta nee liu husi haree diploma, depois konfirma ho numeru ezame ninia husi kurrikulum nee,”nia afirma.
Nia katak, sira identifika diploma falsu 4 nee hahu husi Janeiru too mai Agostu tinan nee. Sira detekta diploma nibel sekundariu jeral 4 neebe falsu husi ema neebe ba legaliza diploma iha diresaun refere.
Nia hatutan, konaba ninia prosesu entrega ona ba parte inspeksaun jeral mak halo prosesu ba asuntu ida nee.
Nunee mos Diretor Servisu Edukasaun Munisípiu Viqueque, Julio Sacadura hatete, iha Munisipiu Viqueque laiha, tanba nee iha Munisipiu nee la akontese buat ida diploma falsu sira.
“Liga ho diploma falsu sira nee, ami hanoin iha Munisipiu Viqueque la akontese buat ida nee. Tanba bainhira ami realiza ezame nasional ho ezame lokal nee, ami iha tiha ona dadus kompletu iha ami nian liman, nee duni ami hatene,”tenik nia.
Entretantu Dire tor Servisu Edukasaun Munisípiu Liquica, Julio da Silva hatete, konaba diploma falsu iha Liquica la identifika, bai-bain iha Munisípiu Dili mak sempre akontese diploma falsu, maibe iha Liquica la akontese ida nee.
Jornalista: Jacinta Sequeira
Editora: Domingas Gomes
