DILI, STLTIMORLESTE.com – Ministeriu Edukasaun (ME) liu husi Edukasaun Munisípiu Dili, inspetor halo monitoring identifika eskola hitu (7) iha Munisipiu Dili presiza halo reabilitasaun.
Haktuir Cesarina Correia Guterres, nuudar Superintendente Edukasaun Munisipiu Dili ba jornalista STL, Kinta nee (30/10/2025).
“Ita nian sala de aula neebe presiza reabilitasaun mak hanesan EBC Manleuana, EBC Fatumeta, EBF Camea Rai hun, EBF Culuhun, EBF Rumbia, EBC Farol, EBC Hera aumenta sala no presiza halo reabilitassun hodi bele aumenta sala iha eskola Camea Rai hun atu nunee bele fasilita ita nian estudantes sira iha prosesu aprendizajen,” nia esplika.
Cesarina salienta, inspetor no inspetora sira nafatin halo monitoring ba atividades hotu neebe mak lao iha eskola sira, liu-liu eskola hirak neebe mak lokaliza iha Munisipiu Dili ninia, hodi haree dezafiu saida deit mak eskola sira enfrenta.
Iha parte seluk, Ministru Edukasaun (ME) Interinu, Domingos Lopes Lemos dehan, planu neebe mak ME iha, kada tinan sempre konstrui sala de aula sira neebe mak iha, dala barak ladun haree hetan saida mak ME implementa hela, maibe realidade iha terenu prosesu ba infraestrutura nee lao makaas, maske rezolve fazeadamente, tanba iha situasaun neebe tenke responde kleur liu tan, tanba ho kondisaun.
“Programa Bono Governu liu husi ME mak iha tinan lima nee sei konstrui rihun ida resin sala de aula iha nivel teritoriu nee, ita esforsu maibe ita la taka dalan, planu no programa nee ita tenke atinji too 100%, tuir programa neebe mak ME iha, maibe fazeadamente, maske iha tinan lima nee ita labele halo too tarjetu, maibe governasaun mai sei kontinua,” katak nia.
Iha parte seluk, Diretor Eskola Sekundariu Jeral nu. 4 Setembru Balide, Sergio A. da Cruz dehan, iha ESJ nu. 4 Setembru Balide sala de aula ualu (8) mak sai risku ba inundasaun iha tempu udan.
“Cruz dehan, iha ESJ nu. 4 Setembru Balide sala aula ualu (8) mak sai risku ba iha inundasaun iha tempu udan,” nia hakotu.
Jornalista: Jacinta Sequeira
Editor: Xisto Mendonça
