DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE), halo identifikasaun ba estudantes defisiensia iha eskola sira husi munisipiu 6.
Tuir Direitor Nasional Edukasaun Inkluzivu Asaun Sosial Eskolar (DNEIASE), Fernando Soares katak, dadus estudantes sira nian presiza tenke kompletu, depois mak identifika defikuldade husi kada estudantes. Depois halo identifikasaun mak foin koordena ho INFORDEPE para fo formasaun ba iha kada nesesidade estudantes sira nian, hodi bele halo akompanhamentu neebe diak iha sala laran, atu nunee labele hatene deit mak defisiensia deit, maibe iha mos defisiensia tilun, mental no seluk tan.
“Ita presiza dadus estudantes sira nian tenke kompletu, para identifika difikuldade kada estudante sira nian, depois halo identifikasaun mak ita foin halo koordenasaun
ho INFORDEPE para fo formasaun ba iha kada nesesidade estudantes sira nian, para ita bele halo akompanhamentu neebe diak iha sala laran, hodi hatene kondisaun kada estudante defisiensia sira nian,” afirma Diretor DNEIASE, Fernando Soares ba STL iha nia knaar fatin ME, Tersa nee (22/10/2024).
Nia dehan, identifika uluk estudantes iha kada eskola, atu nunee bele fo formasaun profesores sira tuir nesesariu, se lae labarik balun ladun iha oportunidade ba edukasaun, nee duni halo uluk identifikasaun, depois mak fo formasaun ba profesor sira tuir nesesidade estudantes sira nian iha kada eskola.
(jac)
