DILI, STLTIMORLESTE.com – Ministeriu Edukasaun (ME) iha kompromisu boot hadia estudante sira nia apredizajen iha maneira oin-oin, inklui uza teknolojia dijital.
Kestaun nee hatoo husi Ministra Edukasaun, Dulce de Jesus Soares liu husi nia diskursu bainhira partisipa iha konferensia ho tema “Driving Digital Transformation in Timor Leste Leveraging Open-Source Platforms for Innovation and Skills” iha CCD, Segunda (25/08/2025).
“Ministeriu Edukasaun iha kompromisu boot atu hadiak ami nia estudante sira nia aprendizajen iha maneira oin-oin, inklui uza teknolojia dijital. Ami foin reforma kurrikulu iha nivel 30 siklu, ho razaun boot liu mak atu prioritiza dezenvolvimentu ba esudante sira nia kompetensia sira sekulu 21 nian, hanesan kriatividade, komunikasaun, hanoin kritiku, nomos literasia dijital,” dehan Ministra.
Dulce dehan, abilidade sira nee sei ajuda estudante sira atu dezenvolve fleksibilidade no abilidade analiza neebe sei presiza atu hetan serbisu sira-neebe seidauk inventa, maibe sei sai nesesidade boot iha futuru.
Ministra nee dehan, Transformasaun dijital iha ME hahu neineik-neineik. Iha 2016 Ministeriu hahu uza teknolojia dijital hodi kontrola eskola sira-nia jestaun no aprendizajen, liu husi aplikativu sira-neebe dezenvolve ba inspetor eskolar no mentor sira. Maibe iha 2020 mak manorin sira rasik tenke uza plataforma online sira ba primeiraves.
“Covid-19 obriga ami atu kria maneira atu asegura aprendizajen liu husi meius dijital ho lais. Nee inklui kria biblioteka dijital, neebe uza too agora, no mos ami uza biblioteka nee ho Google Forms atu fo kursu no teste online ba manorin sira hotu iha territoriu tomak kona-ba Covid-19 no ninia protokolu saude no seguransa nian,” katak nia.
Nia afirma, nee mak pasu boot ba Ministeriu no ba primeiraves introdus profesor sira hotu kona-ba oinsa uza aprendizajen online iha forma baziku.
Nia hatutan, labele haluha apoiu neebe mai husi Ministeriu Transporte no Telekomunikasaun liu, husi TIC TIMOR, tanba laho sira-nia envolvimentu sira sei la asesu nafatin ba programa sira neebe gratuitu ba edukasaun hanesan Google Education Suite no Canva for Education.
Nunee mos Ministru Transportes no Telekomunikasaun Miguel Marques Manetelu hatete, Timor Leste, sira reprezenta liu solusaun neebe kustu-efetivu-sira maka motor ba independensia dijital, kolaborasaun no inovasaun neebe mak moris iha rai laran. Hodi hakuak teknolojias neebe nakloke, foin-sae no emprezariu sira bele harii solusoin neebe adapta komunidade sira enkuantu asesu ba oportunidade global sira.
“Hanesan ita hakat daudaun, mai ita asegura katak teknolojia maka instrumentu ida ba empoderamentu, laos eskluzaun. Mai ita asegura katak ita-nia investimentu sira tradus ba oportunidade loloos ba ita nia povu,” degan nia.
Nia hatutan, tanba nee presiza servisu hamutuk atu Timor Leste nia viajen dijital hetan orientasaun husi inovasaun, inkluzividade no reziliensia.
(eme)
