BAUKAU, STLTIMORLESTE.com – Ministra Edukasaun inaugura edifisiu Pre-Eskolar Avo Nana Irena Olimpia de Almeida Buruma, iha Postu Administrativu Baukau Vila, Munisipiu Baukau.
Ministra Edukasaun, Dulce de Jesus hateten, edifiu Pre-Eskolar Buruma apoiu doador husi East Timor Trading Group (ETTG), neebe iha tinan nee konstrui ona edifisiu Pre-Eskolar hamutuk 4 iha fatin sira hanesan Munisipiu Ermera Dili inklui iha Suku Buruma.
Aleinde konstrusaun edifisiu Pre-Eskolar 4, antes nee mos East Timor Trading Group parseiru metin ho Estadu Timor Leste neebe hahu kedas iha tinan 2012 too ohin loron konstrui edifisiu eskola hamutuk 23.
“Pre-Eskolar iha munisipiu hotu-hotu nee mos sorte boot ida ba ita, ami hatene ho East Timor Trading Group nia apoiu finanseiru no komitmentu, katak ami iha Ministeriu Edukasaun simu nafatin edifisiu eskola kualidade aas ho kustu neebe efetivu,” hateten Dulce hafoin inaugura edifisiu Pre-Eskolar Buruma, Segunda nee (24/03/2025).
Governante nee konsidera eskola mak fatin atu aprende, halo belun, hetan dezafiu no hodi halo estimulasaun atu simu profesores sira iha prosesu aprendizajem, tanba nee husu inan aman sira atu lori labarik idade kiik sira asesu iha Pre-Eskolar, tanba Pre-Eskolar mak baze ba estudante sira nia futuru.
Nunee husu entidades hotu liu-liu inan aman ba estudante sira iha baze atu kuida no tau matan ba edifisiu eskola sira neebe Governu no parseiru sira harii ona, nunee bele fo mahon diak ba estudante sira dura ba tinan naruk.
Enkuantu Chairman of ETTG, Sakib Awan hateten, Timor Leste espesial iha East Timor Trading Group nia fuan durante tinan 24 Timor Leste sai nasaun independente, nunee East Timor Trading Group iha komitmentu atu apoiu komunidade sira iha baze liu-liu ba setor edukasaun, tanba labarik estudante mak futuru nasaun nian.
“Labarik sira mak futuru nasaun nian, ita haree joven sira nakonu ho mehi, kuriuridade no potensial atu muda mundu, maibe mehi sira nee atu bele lao, sira prezisa ambiente neebe moos sala aula neebe seguru,” Sakib akresenta
Nia fundamenta, viajen atu harii hikas sistema edukasaun iha Timor Leste laos fasil, tanba infraestrutura pasadu nian sei eziste ho kondisaun eskola barak mak sei aat, maibe iha posivel atu muda bainhira lideransa sira hamutuk.
Reprezentante komunidade Buruma, atual Xefe Suku Buruma, Liborio dos Santos Freitas agradese ba parseiru East Timor Trading Group neebe bele fasilita ona estudante Pre-Eskolar sira liu husi konstrusaun fatin ba prosesu aprendizajem nian.
“Ami kontente tebes, hanesan Xefe Suku nuudar aman ba kiik oan sira iha Buruma, fatin nee ami konsidera espesial tebes ba ami, ba oin ami sei utiliza ho diak hodi eduka ami nian oan sira,” hateten Liborio.
Tuir informasaun neebe STL asesu katak, Pre-Eskolar Buruma neebe tau naran Avo Nana Irena Olimpia de Almeida de Buruma, nuudar rekonhesimentu ba familia Sakib Awan neebe apoiu ona fundu ba konstrusaun edifisiu Pre Eskolar Buruma.
(tom)
