DILI, STLTIMORLESTE.com – Ministeriu Edukasaun (ME) liu husi Gabinete Unidade Kurrikulu Nasional kontinua produs livru manual ba Ensinu Sekundariu Jeral.
Haktuir Koordenador Gabinete Unidade Kurrikulu Nasional iha ME, João Mau Pelu ba STL, Tersa nee (10/12/2024).
“Livru manual nee balun ita fahe ona ba munisipiu, ami mak fahe livru no kaderneta nee ami fahe hotu ona ba iha munisipiu, maibe ita nian eskola balu neebe mak livru seidauk too ami sei kontinua fahe nafatin. Livru neebe mak ami fahe ona nee ba ensinu sekundariu no ensinu baziku sira, maibe ninia kuantidade nee hau ladun dekor ida, no produsaun ba livru nee agora lao hela iha sentru impresaun,” dehan nia.
João dehan, agora daudaun produs hela livru iha sentru impresaun, maibe nee ba ensinu sekundariu ninia, maibe balun distribui tiha ona ba eskola sira, no balun sei iha faze produsaun nian laran.
“Agora kuantidade produs livru nee mos hau ladun dekor ida, maibe bainhira remata produsaun ita bele distribui fali ba ita nian eskola sira, no ita mos distribui nee bazeia ba pedidu neebe mai husi ita nian eskola neebe menus livrus,” hatete João.
Nunee mos Diretor Eskola Sekundariu Jeral FINANTIL, Aniceto Berlelo dehan, sira nia livru sufisiente ona, no fatin biblioteka mos iha para bele asegura diak liu tan livru sira neebe mak iha, tanba nee eskola FINANTIL laiha problema ba livru.
“Ami nian livrus sufisiente ona, no fatin biblioteka mos iha para bele asegura diak liu tan livrus sira neebe mak iha, tanba nee eskola FINANTIL laiha problema ba livrus,” nia komenta.
Entretantu Diretor Eskola Sekundariu Nobel, Jeremias P. de Jesus hatete, too agora sira sei menus livrus no fatin biblioteka mos seidauk iha, tanba livru balun neebe iha sei rai deit iha edifisiu direitor no profesores sira nia fatin.
“Too agora ami sei menus livrus no fatin biblioteka mos seidauk iha, tanba livru balun neebe iha sei rai deit iha edifisiu direitor no profesores sira nian fatin. Ami eskola privadu la ezije ita nian governu, depende sira fo mai ami simu,” nia haktuir.
(jac)
