DILI, STLTIMORLESTE.com – Ministeriu Edukasaun (ME) liu husi Rekursu Umanus kada loron simu dadus profesores reforma.
Diretor Nasional Rekursu Umanus Ministeriu Edukasaun, João Amaral hatete, dadus profesor reforma neebe ohin mensiona nee bele aumenta, tanba husi parte Rekursu Umanus sei kontinua simu dadus profesores reforma ninia.
“Ita sei loke tan rekrutamentu tuir vagatura neebe mensiona, tanba komesa Janeiru 2026 obrigatoriu tenke lao, sira neebe mak iha bolsa nee koloka seidauk too, entaun ME tenke rekruta tuir vagatura tuir pensaun obrigatoriu, tanba tuir ME nian nee iha 1000 ou besik 2000 neebe sei reforma iha 2026, nee obrigatoriu ho idade 65 tuir lei neebe mak vigora,” hatete João Amaral ba jornalista STL iha nia knaar fatin ME, Kinta nee (24/04/2025).
Iha parte seluk, Diretor EBC Manleuana, Carlos Correia hatete, agora daudaun profesores nain 3 ou 4 mak tama ba idade reforma, tanba profesor balu idade 70 resin ona, sira nee hanesan profesor da turma.
“Ami nian profesor reforma nee seidauk hatama karta rekerimentu no sira hein deit despaisu husi Komisaun Funsaun Publiku, tanba nee karta rekerimentu sira la hatama ida, tanba ida nee depende ba sira husi nasional,” nia esplika.
Iha fatin seluk, Diretor Servisu Edukasaun Munisipiu Likisa, Julio da Silva dehan, tuir dadus neebe rejista iha profesor hamutuk 125 neebe mak tama ona ba idade reforma.
“Dadus neebe ita submete ona ba Ministeriu Edukasaun. Ita iha total profesor reformadu hamutuk 125. Sira seidauk hatama karta rekerimentu ba iha Ministeriu Edukasaun, maibe sira hein deit lei reforma obrigatoriu,” dehan nia.
Entretantu Diretor Servisu Edukasaun munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reforma.
(jac)
