DILI, STLTIMORLESTE.com – Ministeriu Edukasaun (ME) liu husi Inspetor eskolar kontinua halo kontrolu ba okupantes neebe sei hela iha areador eskola.
Tuir Adjuntu Inspetor Jeral iha ME, Dodolfo Henrique Aparicio dehan, eskola neebe mak komunidade okupa foti ona dadus, maibe oras nee daudaun eskola rua mak konsege ekipa konjuntu hasai ona sira mak EBC 10 Dezembru no EBC Bidau Akadiru-hun, maibe eskola balun tama ona iha karta notifikasaun.
“Eskola neebe mak ita nian komunidade okupa, ita foti ona dadus, maibe oras nee dadaun eskola rua mak konsege ekipa konjuntu hasai ona sira, liu-liu iha EBC 10 de Dezembru no EBC Bidau Akadiru-hun. Aleinde nee eskola balun tama ona iha karta notifikasaun, depois sira sei sai hotu iha areador eskola nian,” dehan nia ba STL, Tersa (23/09/2025).
Nia hatete, iha eskola lubuk ida mak sei okupa husi komunidade sira, tanba nee husi parte inspesaun jeral nafatin halo kontrolu ba okupantes neebe mak too ohin loron sei hela iha areador Eskola Munisipiu Dili.
“Ita hatene katak, governu iha ona planu para atu halo reabilitasaun ba eskola hotu-hotu neebe mak iha Dili laran, tanba nee komunidade sira tenke book aan dadaun ona,” nia tenik.
Nia hatutan, governu iha ona planu halo reabilitasaun ba eskola hirak neebe maka laiha kondisaun neebe diak.
Jornalista: Jacinta Sequeira
Editora: Domingas Gomes
