DILI, STLTIMORLESTE.com – Tinan nee Ministeriu Edukasaun (ME) liu husi Gabinete Avaliasaun Lisensiamentu no Akreditasaun (GALA) la halo monitorizasaun ba eskola publiku no privadu sira.
Koordenador GALA, Antonio Tomas Maia hatoo kestaun nee ba STL iha nia knaar fatin Vila Verde, Kuarta nee (26/03/2025).
“Tinan ida nee ita la halo monitorizasaun ba eskola publiku no pribadu sira seluk, tanba ita nian monitorizasaun foka liu ba eskola internasional sira, ida nee mak ita sei halo hela iha tinan ida nee, ita halo monitorizasaun nee halo etapa, primeiru ita halo monitorizasaun foka liu ba iha sira nian infraestrutura, entaun ita halo ona ba eskola 8, depois sira nian dadus ita sei halo analiza, kopi fo fali eskola sira, atu nunee bele toma konsiderasaun ba iha rekomendasaun neebe mak ita fo ba sira para bele toma konsiderasaun ba sira, nunee profesor sira bele melhoria sira nian frakeza neebe mak iha,” nia deklara.
Nia dehan, tinan nee halo monitorizasaun eskola internasional 8 neebe mak lokaliza iha kapital Dili, ba oin identifika eskola internasional sira neebe iha munisipiu, sei halo monitorizasaun, tanba liu husi monirorizasaun nee atu avalia frakeza sira neebe iha, depois ita halo rekomendasaun ba sira, oinsa bele kinsidera, ho nunee bele melhora sira nian kondisaun eskola sira neebe mak iha, tantu iha nasional no munisipal.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, agora daudaun nee klase paralelu iha Munisipiu Ainaro ensinu baziku 11, ensinu sekundariu jeral 3 no tekvo nee iha 1.
Entretantu Diretor Servisu Edukasaun Munisipiu Likisa, Julio da Silva hatete, paralelu iha Munisipiu Likisa haat, nee nível sekundariu hotu, atu taka la prienxe kriteria oinsa, tanba paralelu sira nee iha tinan kotuk estudantes sira partisipa iha ezame nasional lao ho diak.
(jac)
