DILI, STLTIMORLESTE.com – Ministeriu Edukasaun (ME), Ministeriu Administrasaun Estatal (MAE) ho Ministeriu Saude (MS) halao enkontru konsultasaun no sosializa revizaun manual programa merenda eskolar.
Dehan Diretor Jeral Desentralizasaun no Governu Lokal, Antonio Augosto Guterres ba jornalista sira hafoin abertura ba enkontru konsultasaun no sosializasaun revizaun manual programa merenda eskolar iha city 8 Manleuana, Dili, Kinta nee (24/04/2025).
“Ita halo hela workshop ida kona-ba konsultasaun ba entidades hotu-hotu, MAE, ME, agrikultura no Ministeriu Saude, prepara esbosu mata dalan ba implementasaun merenda eskolar, atu partilha ba entidades implementador iha nível munisipal no nasional, iha Dili prioridase ba inspetor eskola hotu-hotu partisipa para oinsa asegura ninia funsionamentu iha implementasaun merenda eskolar relativamentu ho dekretu governu 3/2025,” katak nia.
Antonio dehan, konsultasaun nee halao loron ida deit, despaisu konjuntu husi ministeriu tolu, Estatal, Edukasaun no saude mak ohin ekipa sosializasaun tun ba iha munisipiu idak-idak atu nunee sosializa ba entidades relevantes para lao tuir mata dalan neebe hetan ona despaisu.
“Agora daudaun nee fo hela vantajen liu ba prezidente autoridade halo selesaun ba grupu implementador bele mos empreza, lider komunitariu,” dehan nia.
Iha fatin hanesan, Belchior Maria Almeida Barros Guerra hanesan Xefe Departamentu Konsesoins no Programa Merenda Eskolar iha ME hatete, parte husi ME neebe mak fo nafatin suporta teknikamente programa merenda eskolar, servisu hamutuk ho MAE.
“Ohin ita halo revizaun manual ba dala tolu, tanba dekretu governu nee rasik neebe mak foin aprova iha fulan Abril, koalia kona-ba prosedimentu hotu, neebe mak implementasaun programa merenda eskolar nee lao, antes iha tinan 2022 dekretu lei sesenta um, koalia kona-ba ambitu kona-ba suporta merenda eskolar, dekretu ida nee atu haforsa dekretu lei sesenta um neebe mak fo sai,” tenik nia.
Nunee mos Patricio da Costa Magno nuudar Diretor Servisu Edukasaun Munisipiu Ainaro hatete, primeiru atu dehan katak, merenda eskolar iha 2025 nee hahu lao iha inisiu fulan Marsu no orienta ona ba EJP sira ba implementasaun merenda eskolar, agora kona-ba menu neebe iha la haree ba iha manual, tanba menu nee bazeia ba produtu lokal neebe mak iha.
(jac)
