BAUKAU, STLTIMORLESTE.com – Ministeriu Edukasaun (ME) moderniza ona prosesu aprendizajen iha eskola Ensinu Sekundaria Jeral (ESJ) 01 Tirilolo, Postu Administrativu Baukau Vila, Munisipiu Baukau.
Diretor ESJ 01 Tirilolo, Estevão Ximenes Gusmão informa, inisiu tinan 2026 nee, Governu liu husi Ministeriu Edukasaun apoiu ekipamentus hanesan projetor no komputador ba eskola Ensinu Sekundaria Jeral 01 Tirilolo atu fasilita liu tan estudante sira nia prosesu aprendizajen. Ekipamentus neebe parte eskola simu husi Ministeriu Edukasaun mak hanesan projetor hamutuk unidade 15, komputador unidade 15 neebe estabese ona iha sala 15 no utiliza ona ba hanorin estudante sira hahu iha fulan Janeiru 2026 too ohin loron.
“Nia vantajen mak ita tama ona iha ASEAN ita nia edukasaun bele ona lao pasu ida, ami profesores mos koko atu adapta ba mundu teknolojia, tanba prosesu aprendizajen tama ona iha era dijitalizasaun, neebe hau sente nia diak iha, tanba buat hotu uza teknolojia,” Diretor ESJ 01 Tirilolo Estevão Ximenes Gusmão hateten ba STL iha nia knaar fatin Tirilolo Baukau, Kuarta (11/02/2026).
Nia komenta, inisiu tinan nee Ministeriu Edukasaun konsege hahu ona halo mudansa ba iha prosesu aprendizajen, tanba iha eskola Ensinu Sekundaria Jeral 01 Tirilolo iha inisiu anu letivu 2026 nee profesores sira la utiliza ona giz hodi hakerek materia iha kuadru metan hafoin estudante sira hakerek tuir iha kadernu, maibe profesores sira prepara deit materia iha aplikasaun Power Point no Word hodi intruduz no fo esplikasaun materia ba estudante sira liu husi projetor.
Nia konsidera, metodu prosesu aprendizajen iha nivel eskola publiku sira hahu avansa, tanba materia prosesu aprendizajen nian Governu fasilita ona profesores sira atu introduz ba estudante sira liu husi projetor, maibe laos materia hotu-hotu aprende no esplika liu husi projetor.
“Materia exata sira hanesan matematika no fizika ita uza giz no espidol laos permanente para esplika ba estudante sira,” Estevão katak.
Iha fatin hanesan, estudante desimu segundu anu Tomasia da Silva konsidera, metodu hanorin estudante sira iha eskola Ensinu Sekundaria Jeral 01 Tirilolo ho projetor hafasil liu tan estudante sira nia ensinu aprendizajen.
“Uza giz, primeiru ami tenke hakerek, dala ruma kleur liu profesores sira atu esplika dada tempu naruk liu, maibe uza projetor nee hafasil liu tan muda deit ba Power Point esplikasaun mak barak bainhira too iha ezame ami nia materia kompletu ona akompanha ezame fasil liu tan,” Tomasia espresa.
Tuir estudante nee katak, prosesu aprendizajen iha eskola utiliza projetor diak liu, tanba kada loron iha tempu barak ba profesores sira halo esplikasaun materia ba estudante sira iha sala laran, maibe prosesu aprendizajen sira antes nee difikulta profesores sira atu aselera prosesu esplikasaun materia ida ba estudante sira, tanba tarde iha hakerek.
Maibe ho prosesu aprendizajen uza projetor nee sei fasil liu tan estudante sira kobre materia hotu hodi prepara aan diak liu tan ba iha ezame sira.
“Iha ona projetor no komputador ba profesores sira, maibe falta internet gratis, entaun estudante neebe atu send materia ba sira nia telefone, nee ami ense pulsa rasik hafoin send materia ba ami nian telefone no balu ba print rasik depois mai aula laran ami tuir deit ona esplikasaun,” Tomasia komenta.
Estudante nee husu Ministeriu Edukasaun atu estabelese tan linha internet gratuita iha eskola Ensinu Sekundaria Jeral 01 Tirilolo atu nunee hafasil liu tan estudante sira transfere materia ba malu liu husi online, tanba daudaun seidauk iha internet, estudante sira tenke lori materia ba rental hafoin kopia hodi estuda iha uma.
Liga asuntu nee STL tenta konfirma ho Diretor Servisu Munisipal Edukasaun Baukau, maibe laiha fatin atu fo komentariu.
Entretantu total estudante iha Eskola Ensinu Sekundaria Jeral 01 Tirilolo ba anu letivu 2026 husi desimu anu too desimu segundu anu hamutuk 1.175.
(tom)
