DILI, STLTIMORLESTE.com – Ministeriu Edukasaun (ME) liu husi Edukasaun Munisipiu Dili, monitoring ezame nasional ano letivu 2024 ba eskola sira iha Munisipiu Dili.
Lia hirak nee hatoo husi Diretor Edukasaun Munisipiu Dili, Sabino Perreira ba STL hafoin monitorin ezame nasional iha EBC Manleuana, Segunda nee (14/10/2024).
“Ohin hau abertura ezame nasional iha São Jose Operariu, hafoin abertura estudantes sira tama iha sala, depois hau ba monitoring iha ESJ nu. 4 Setembru, monitoring iha neeba lao diak, depois hau mai fali iha EBC Fatumeta, nee mos ezame lao diak. Agora hau mai iha EBC Manleuana nee mos ezame lao diak, hotu-hotu lao tuir orden neebe mak iha, hanesan pontus ezame kompletu, ita nian vizilantes sira mos halo vizilantes lao ho diak, estudante sira mos tama sala tuir ezame loron dahuluk ninia,” dehan nia.
Nia afirma, ezame nasional ba loron dahuluk ninia, nia rasik seidauk simu informasaun ruma kona-ba pontus ezame ka vizilantes, neebe seidauk simu informasaun kona-ba asuntu neebe ohin mensiona, nee duni atividades ohin loron primeiru nee lao diak hanesan baibain.
Nunee mos Diretor EBC Manleuana, Carlos Correia dehan, total estudantes husi eskola EBC ida nee hamutuk 278 mak partisipa iha ezame nasional, sira nian vizilansia nee profesores husi EBC Fatumeta mak mai halo vizilansia ba estudantes sira husi eskola ida nee, ohin antes tama iha sala sei kanta hino nasional, no diretor eskola rasik halo diskursu hodi hatoo mensajen ba estudantes sira.
Nunee mos Carlito do Rego nudar estudante hatete, ohin sira hahu partisipa iha ezame nee ba loron primeiru ninia, falta loron lima mak foin hotu, maibe hanesan estudantes tenke estuda, ho nunee bele hafasil sira iha ezame nasional.
(jac)
