DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE), tinan nee halao monitorizasaun programa merenda eskolar ba eskola sira iha Munisipiu Dili.
“Kona-ba monitorizasaun ba iha programa merenda eskolar neebe implementa tuir menu neebe iha. ME ninia parte ita halo monitorizasaun iha avaliasaun ba implementasaun sira neebe bazeia ba kalendariu edukasaun no kalendariu implementasaun tuir dia efetivus neebe iha, maibe ita servisu hamutuk ho MS, ESTATAL, liu-liu ba munisipiu sira, haree ba iha fiskalizasaun nomos haree ba iha munisipiu tomak, liu-liu iha implementasaun merenda eskolar tuir kalendariu neebe mak ohin mensiona,” dehan Diretor Nasional Edukasaun Inkluzivu Asaun Sosial Eskolar (DNEIASE), Fernando Soares ba STL iha nia knaar fatin Vila Verde, Kuarta nee (02/04/2025).
Nia dehan, tuir dia efetivus nee oinsa atu haree iha implementasaun tuir kalendariu ka lae, tuir dia efetivus nee ka lae, nunee mos ninia objetivu nee atu haree, balun hahu no balun seidauk.
“Monitorizasaun nee agora daudaun halao iha kapital Dili no ba oin sei iha munisipiu seluk, tanba lao tuir etapa, tuir kalendariu neebe mak ita planea ona, tanba nee ita halo monitorizasaun hahu uluk ita nian eskola sira iha Munisipiu Dili,” tenik nia.
Fernando dehan, Ministeriu liu husi diresaun ida nee nafatin iha linha koordenasaun neebe mak diak ho parte ESTATAL no MS, ho ida nee ME tinan nee halo monitorizasaun merenda eskolar ba eskola neebe lokaliza iha Munisipiu Dili neebe besik.
Iha fatin seluk, Diretor Ensinu Baziku Sentral (EBC – sigla português) Manleuana, Carlos Correia afirma, merenda eskolar agora iha mudansa ona, tanba hahu husi loron Segunda too Sesta nee estudantes tenke han aifuan, tanba uluk han aifuan nee loron tolu deit.
“Mudansa ba iha aifuan nee ikan ho ayam potong la tama iha menu, maibe naan karau, koto, manu tolun, modo tahan ho aifuan hanesan hudi, aidila no apel, total estudantes neebe asesu ba programa merenda eskolar hamutuk 1.888 estudantes, nee duni merenda eskolar lao hanesan baibain,” nia afirma.
(jac)
