DILI, STLTIMORLESTE.com – Ministeriu Edukasaun (ME) hamutuk ho Ministériu Saude (MS) sei fo orientasaun ba lideransa eskola no Ekipa Jestor Programa (EJP) merenda eskolar.
Lia hirak nee hatoo husi Xefe Departamentu Programa Merenda Eskolar iha ME, Belchior Maria Almeida Barros ba jornalista STL iha nia knaar fatin Vila Verde, Kuarta nee (16/07/2025).
Preparasaun neebe mak iha katak, Ministériu Edukasaun koordena mos MAE no Ministeriu Saude, liu-liu ba iha diresaun nasional nutrisaun nomos diresaun nasional ba ai-haan seguru ninia husi MS, nomos ho diresaun nasional planeamentu finansas Munisipiu nian neebe mak toma konta responsavel ba merenda eskolar nian halo ona koordenasaun, agora hein deit proposta sira neebe mak ami hatoo ona, hein autorizasaun husi boot sira, kuandu proposta sira nee autoriza, husi atividades neebe ami atu halao ba ita nian albu sira mak liu-liu ami fokus liu ba iha kozineira sira,” katak nia.
Nia akresenta, tanba nee sira halo orientasaun ida nee halao ba kozineira ka EJP sira, liu-liu oinsa mak sira bele prepara hahan neebe mak ho diak, tanba koalia kona-ba nutrisaun hahan neebe atu fo ba estudantes sira nee ho diak, entaun halo koordenasaun ho parte nutrisaun hahan seguru husi MS nian, sira preparadu ona, ho materia neebe sira rasik atu tun ba fo orientasaun ba kozineira nomos Diretor, Koordenador, Inspetor eskolar, inklui inan aman balun no EJP sira.
“Entaun iha nee ami hein hela bainhira proposta nee hetan aprovasaun ami nian tarjetu nee iha fulan Agostu ami sei halo orientasaun ida nee ba ita nian lideransa eskola nomos grupu EJP sira, ida nee mak ami prepara ona,” nia esplika.
Iha fatin seluk, Diretor EBC Manleuana, Carlos Correia dehan, hanesan diretor eskola uluk sira simu ona formasaun husi ME, liu-liu kona-ba implementasaun merenda eskolar, oinsa fo hahan neebe diak ba estudantes.
“Uluk ami tuir ona formasaun oinsa mak ita nian ekipa EJP sira prepara ai-haan neebe diak ba estudantes sira,” tenik nia.
(jac)
