DILI, STLTIMORLESTE.com – Ministeriu Edukasaun (ME) nafatin halo kontrola ba programa merenda eskolar neebe mak daudaun lao hela iha eskola sira.
Xefi Departamentu Programa Merenda Eskolar iha Ministeriu Edukasaun (ME), Belchior Maria Almeida Barros dehan, agora papel ME nian mak oinsa atu haree no halo kontrola katak, servisu neebe durante lao nee diak ona ka lae. Agora atu haree ba ninia implementasaun nee nibel Munisipiu ninia responsabilidade, ida nee maka agora dadaun sira halo hela kordenasaun nee, atu nunee sira tenke kumpri manual neebe iha.
“Ami nian lina kordenasaun ho parte relevante sira, ida nee agora ami lao hela, tanba too agora ami sei halo kordenasaun, tanba buat hotu nee iha dekretu setenta um nee koalia klaru katak, 75% nee orsamentu tenke gasta ba hola produtu local. Agora nee kabe ba responsabilidade iha nibel Munisipiu ida-idak, liu-liu ba Diretor Edukasaun, Diretor Alimentar Munisipiu nomos Diretur Saude Munisipiu no Administrador Postu sira maka tenke halo kordenasaun ba asuntu sira hanesan nee,” dehan Belchior ba jornalista STL, Segunda (01/09/2025).
Nia akresenta, implementasaun programa merenda eskolar lao diak hela, maibe eskola rua ka tolu iha Munisipiu Dili sei hasoru hela problema, inklui eskola balun iha Munisipiu. Problema mak konaba dadus transferensia, ida nee maka sai problema, maibe implementasaun merenda eskokar agora lao diak.
Nunee mos Kordenadora EBF Vila Verde, Filomena Casmira hatete, programa merenda eskolar lao fali ona iha eskola, maibe kuzeneira sira bainhira merenda nee lao, sira la fo hatene eskola, derepente deit sira tein ona.
Entretantu Diretor Servisu Edukasaun Munisipiu Likisa, Julio da Silva hatete, implementasaun programa merenda eskolar iha Liquica lao hanesan bai-bain, tanba inspektur eskolar sira nafatin halo kontrola ba programa refere.
Jornalista: Jacinta Sequeira
Editora: Domingas Gomes
