DILI, STLTIMORLESTE.com – Governu liu husi Ministériu Edukasaun (ME) iha ona planu atu halo rezidensia ba bolsa kandidatu profesores sira, no antes tama iha ezame nasional sei koloka bolsa kandidatu profesores ba Ensinu Sekundariu no Tekniku Vokasional.
Liafuan nee haktuir husi Ministra Edukasaun, Dulce de Jesus Soares ba jornalista sira iha salaun Ian Martin Balide, Tersa (23/09/2025).
“Atu halo rezidensia nee ita iha planu, hanesan ita boot sira hatene katak, Orsamentu Jeral Estadu aloka mai ME nee, tinan ida ita halo sala de aula hira. Nee duni ita nian planu nee iha, maibe ita halo fazeadamente. Governu iha intensaun katak, presiza duni atu iha rezidensia ba professores, liu-liu ba bolsa de kandidatu professores sira,” dehan Ministra nee.
Governante nee dehan, maioria professores neebe hanorin iha nee ba, sira hela besik eskola neebe sira hela ba no bolsa kandidatu professores sira. Fiar katak, beibeik ba beibeik governu sei halo rezidensia ba profesor sira.
Nia hatutan, bolsa kandidatu ba ensinu sekundariu prosesu nee mos iha 2025 nian laran nee, antes tama iha ezame nasional sei halo kolokasaun ba sira.
Jornalista: Jacinta Sequeira
Editora: Domingas Gomes
