BAUKAU, STLTIMORLESTE.com – Ministra Edukasaun (ME), Dulce de Jesus Soares preokupa estudante sira neebe la pasa klase.
Ministra Edukasaun katak, tuir survei husi UNICEF iha Timor Leste ba labarik estudante sira iha nivel eskola ensinu baziku primeiru anu, husi labarik nain 5 iha nain 1 la pasa klase, tanba valor ezame la prienxe, maiba lo-loos nee labele akontese, tanba labarik estudante sira iha direitu atu pasa, maibe razaun la pasa tanba prosesu estudu hahu la liu husi pre-eskolar.
“Tanba nee, problema Ministeriu Edukasaun atu haree ba situasaun edukasaun, tuir lo-loos ministra la preokupa ho labarik ida la pasa, tanba labarik barak tebe-tebes ba preokupa fali labarik ida, maibe ida nee mak trabalho de casa Ministeriu Edukasaun tenke halo atu buka tuir labarik nee iha neebe atu nia pasa iha ezame,” Ministra Dulce hateten iha ambitu implementasaun projetu EI iha Suku Bukoli, Postu Baukau Vila, Sesta (16/01/2026).
Ministra Dulce agradese ba parseiru dezenvolvimentu hanesan UNICEF no KOIKA neebe kobre ona territoriu nasional foti dadus kona-ba labarik idade kiik sira iha nivel eskola ensinu baziku primeiru anu infrente problema labele pasa klase.
Maibe nee problema Ministeriu Edukasaun atu buka tuir, nunee bele hatene nia motivu hodi nunee la implika ba labarik ida nia futuru.
“Ministeriu Edukasaun servisu makaas ho profesores profesora sira atu tau atensaun ba estudante primeiru segundu no terseiru anu iha fulan junhu ita sei halo teste boot ida atu sukat labarik sira nia nivel literasia no numerasia,” Dulce informa.
Ministra Edukasaun nee katak, iha fulan Junhu tinan nee Ministeriu Edukasaun sei fo teste ba estudante ensinu baziku husi primeiru anu too terseiru anu kona-ba numerasia no literasia, tanba faktus hatudu estudante barak la hatene lee no hakerek kauza mos husi atetudi profesores sira nian neebe iha nivel eskola fo atesaun masimu ba estudante klase boot sira enkuantu estudante kiik sira abandona.
Governante nee konsidera, konseitu refere sala boot ida neebe professores sira hanoin, tanba nee husu profesores sira muda pensamentu lori estudante klase primeiru anu too terseiru anu atu hatene lee no hakerek.
(tom)
