DILI, STLTIMORLESTE.com – Ministeriu Edukasaun (ME) kontinua fo prioridade atu reforsa nível literasia nomos numerasia iha ensinu baziku.
Ministra Edukasaun (ME), Dulce de Jesus Soares hatoo kestaun nee ba jornalista sira iha salaun Ian Martin Balide, Segunda nee (02/06/2025).
“Ministeriu Edukasaun nafatin fo prioridade hanesan ita boot sira haree formasaun iha nee, no fatin seluk mos iha formasaun, iha munisipiu mos iha formasaun, ita fo nafatin prioridade ba reforsa ita nian nível literasia no numerasia iha ensinu baziku, ida nee importante liu, tanba sai preokupasaun boot ida katak, ema barak haree labarik barak ba eskola, maibe sira lee la hatene,” katak nia.
Nia dehan, ME kontinua reforsa ba inspektor sira, mentor sira, lider eskola sira, formasaun kona-ba jestaun eskolar, nunee mos formasaun kona-ba literasia numerasia bazika ba estudantes sira, ida nee importante tebes-tebes.
Iha fatin seluk, Feliciano Gusmao nuudar profesor husi ensinu baziku Fatumeta hatete, ida nee kompetensia ME nia programa hodi fo prioridade ba nível literasia numerasia, tanba labarik la hatene lee nee husi kedas SD sae mai, nee labarik sira mak lakohi atu aprende nee.
“Hau hanoin ida nee kompetensia ME nia programa hodi fo prioridade ba nibel literasia numerasia, tanba labarik la hatene lee nee husi kedas SD sae mai, nee labarik sira mak lakohi atu aprende nee. Ami esforsu haruka sira lee maibe balun lee hatene, no balun ladun hatene,” tenik nia.
(jac)
