DILI, STLTIMORLESTE.com – Ministeriu Edukasaun (ME) liu husi unidade kurrikulu nasional, tinan nee kontinua produs kaderneta ba estudante Pre Eskolar no Ensinu Baziku.
Haktuir Koordenador Gabinete Unidade Kurrikulu Nasional iha ME, Joao Mau Pelu ba STL iha nia knaar fatin Vila Verde, Sesta nee (07/03/2025).
“Ita produs pur volta ba Pre Eskolar 30 mil resin, depois ba Ensinu Baziku segundu siklu produs 40 mil, terseiru siklu nee ita produs 30 mil, nomos ba ensinu sekundariu agora sei prosesu iha sentru impresaun hela, maibe produsaun tinan nee ita tuir ita nian prozesaun estudantes foun nee hira, nee mak ohin hau temi nee, ita produs. Hau repete husi Edukasaun Ensinu Pre Eskolar nee ita produs 30 mil, ba primeiru no segundu siklu ensinu baziku, depois 40 mil ba terseiru siklu, nee ita produs tuir prozeksaun nee numeru estudantes,” nia dehan.
João hatutan, bainhira produs hotu mak bele halo distribuisaun ba iha eskola sira neebe mak sei menus kaderneta eskolar, no depende mos pedidu sira mai husi eskola sira, numee husi Edukasaun Munisipal sira mai foti.
Iha fatin seluk, Diretor Edukasaun Munisipiu Ainaro, Patricio da Costa Magno hatete, kaderneta eskolar nee eskola balu iha ona no balu mak sei presiza, tanba kaderneta nee ba estudantes foun sira mos presiza.
“Kaderneta eskolar nee ita nian eskola balu iha ona no balu mak sei presiza tan kaderneta, tanba kada tinan eskola idak-idak simu estudantes foun,” nia komenta.
(jac)
