DILI, STLTIMORLESTE.com – Ministeriu Edukasaun (ME) rekonhese programa merenda eskolar iha eskola sira Munisipiu Dili paradu.
Haktuir Belchior Maria Almeida Barros hanesan Xefe Departamentu Programa Merenda Eskolar iha ME ba jornalista STL, Kuarta nee (16/07/2025).
“Los duni kuaze iha Munisipiu Dili merenda eskola paradu, tanba orsamentu Q2 nia hotu ona no hein hela prosesu Q3 nia seidauk sai, paradu hela tama fulan Agostu mak sei lao fali, munisipiu seluk seiduk iha informasaun, maibe eskola sira iha Munisipiu Dili nian nee merenda eskolar paradu hela. Koordenasaun hela ho Xefe Departamentu ba orsamentu programa merenda eskolar Munisipiu Dili ninia hatete katak, los duni iha fim de fulan Junhu ba Q2 ninia orsamentu hotu ona,” nia afirma.
Nia dehan, implementasaun Q3 nian ba Munisipiu Dili hetan ona aprovasaun hotu, agora ninia prosesu nee mak agora sei hein hela, husi parte finansas ninia halo transferensia orsamentu ba iha konta Ekipa Jestor Programa sira nian, purtantu horiseik sira halo hela koordenasaun, husi esplikasaun neebe husi responsavel finansas Munisipiu Dili nian katak, karik semana ida nee orsamentu tama, sira haree oinsa mak atu hein too fulan Agostu mak foin bele realiza.
“Semana oin eskola feriadu, tanba ida nee mak programa merenda eskolar ba Q3 ninia Munisipiu Dili sei lao iha fulan Agostu nia laran, merenda eskolar iha Munisipiu hotu-hotu lao hanesan baibain, ami hetan ona informasaun ikus neebe ohin hau hetan husi Bobonaro katak, ba Q3 nian orsamentu foin tama iha konta bankaria Ekipa Jestor Programa sira nian horiseik,” nia informa.
Iha parte seluk, Diretor Ensinu Baziku Sentral (EBC – sigla português) Manleuana, Carlos Correia dehan, kuaze besik semana rua ona programa merenda eskolar paradu too agora, tanba osan ba implementasaun merenda eskolar seidauk sai, no estudantes sira labele asesu ba iha programa merenda eskolar, sei hein orsamentu ba programa refere.
“Hau hanoin kuaze besik semana rua ona programa merenda eskolar paradu too agora, tanba osan ba implementasaun merenda eskolar seidauk sai no estudantes sira labele asesu ba iha programa merenda eskolar, sei hein orsamentu ba programa refere,” katak nia.
Carlos hatutan, merenda eskolar sei paradu hela, tanba osan nee seidauk sai, oinsa mak merenda nee atu lao, bainhira osan ba programa nee sai mak bele sosa sasan, atu nunee EJP sira bele tein programa merenda eskolar ba estudantes sira, no besik semana rua ona estudantes sira la asesu ba merenda.
Nunee mos Luisa Amelia Florindo Reis hanesan Xefe Gabinete Apoiu Tekniku iha EBC Manleuana hatete, kona-ba programa merenda eskolar nee EJP sira mak bele koalia, tanba sira mak jere merenda eskolar.
“Konaba asuntu merenda eskolar hau labele koalia ba asuntu ida nee, tanba nee Ekipa Jestor Programa sira mak bele koalia, tanba sira mak jere programa ida nee,” nia informa.
(jac)
