DILI, STLTIMORLESTE.com – Ministeriu Edukasaun (ME) sei sosa komputador hodi fo apoiu ba Eskola Sekundariu Jeral (ESJ) hamutuk 74.
Diretor Nasional Ensinu Sekundariu iha ME, Benjamin Gomes da Cruz Fernandes dehan, ekipamentus hanesan komputador tinan nee responde daudaun balun ona.
“Kona-ba ekipamentus hanesan komputador tinan nee ami responde balun, maibe beibeik no beibeik ita sei rezolve eskola hotu. Planu orsamentu ami seidauk foti, agora ami hatete deit katak, instalasaun tinan nee hahu husi Suai mai ona, tanba nee ME sei fo apoiu komputador ba ita nian eskola sira,” dehan nia ba STL, Segunda (15/12/2025).
Tuir Benjamin, eskola 74 sei presiza komputador, maibe agora sira haree ba orsamentu no rezolve ona eskola 24, maibe eskola 74 neebe ohin mensiona nee ME sei fo apoiu komputador ba sira.
Iha fatin seluk Diretor Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Becora-Díli, Tomas Pinto katak, presiza reabilita iha tasaun total ba sala de aulas neebe at total, no presiza kampo multi funsaun iha aredores eskola, estudantes sira halao pratika kada semana, maibe depende ba professores produtivu sira nian.
“Relasiona ho asuntu ida nee, konaba ekipamentus no fasilidades seidauk kompleta masimu liu-liu ba iha area informatica no eletronica e eletricidade seidauk sufisiente. Ami presiza mak komputador 90 ba kada departementu no presiza instalasaun foun ba laboratorium neebe kualifikadu no presiza rekursu, liu-liu iha area produtivu sira,” dehan nia.
Entretantu Diretor Eskola Hotelaria no Turizmu Bekora, Charles F. Guterres antes nee dehan, durante nee estudantes sira bainhira simu tiha teoria, sira tenke halao pratika, tanba labele simu deit teoria tenke halo mos pratika, maibe ekipamentus mak presiza aumenta tan ba estudantes sira hanesan komputador.
Jornalista: Jacinta Sequeira
Editora: Domingas Gomes
