DILI, STLTIMORLESTE.com – Ministeriu Edukasaun (ME) sei distribui komputador ba eskola tekniku vokasional sia (9) neebe mak lokaliza iha Munisípiu lima ou neen, neebe seidauk hetan komputador.
Haktuir Diretor Nasional Ensinu Tekniku Vokasional, Fernando Mouzinho Gama ba STL, Kuarta nee (25/02/2026).
“Ida nee tuir informasaun husi aprovizionamentu dehan, ekipamentus informatika nee tama ona iha semana ida nee nian laran, neebe ita atu distribui ba eskola tekvo sia, kada eskola tekvo ida sei hetan komputador 35, ita nian planu mak ida nee, montante orsamentu trezentus mil hanesan nee, ita sei halo distribuisaun iha fulan Marsu tinan ida nee nia laran. Ita sei distribui ba eskola sia neebe lokaliza iha munisipiu lima ou neen, nee ba ita nian eskola sira neebe seidauk hetan,” dehan nia.
Nia dehan, ba eskola neebe tinan nee seidauk hetan komputador, nee ministériu nafatin fo apoiu ekipamentus pratika nian ba estudantes sira, tanba tekvo nee presiza iha ekipamentus, ho nunee estudantes sira bele halao pratika iha ida-idak nian eskola.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, Ministeriu Edukasaun (ME) fo ona apoiu komputador 30 ba eskola sekundariu balun, neebe agora daudaun profesores sira hanorin uza sistema eletroniku.
“Nee ami sei haree ba iha ami nian orsamentu, maibe ami sei buka meus oinsa para bele hetan ajuda, atu nunee bele fasilita nafatin ita nian eskola neebe ita seidauk fo apoiu komputador ba ita nian eskola sira,” katak nia.
Nia dehan, Eskola Sekundariu Jeral 10 Dezembru Komoro seidauk hetan komputador, tanba eskola refere ninia edifisiu rasik sei hamutuk ho ensinu baziku, atu nunee bele tau ekipamentus iha nee ba, nee duni ME nafatin fo apoiu ba eskola sekundariu neebe seidauk hetan ekipamentus komputador.
“Ami sei esforsu aan nafatin hodi bele apoiu ekipamentus eletronika ba ita nian eskola hirak neebe ita seidauk fo apoiu ba sira, tanba eskola balun ita hahu fo ona apoiu, agora balun mak seidauk,” tenik nia.
(jac)
