DILI, STLTIMORLESTE.com – Iha tempu badak nia laran Ministeriu Edukasaun (ME) sei atribui konsesaun eskolar ba eskola 60, kompostu husi sekundariu jeral públiku no privadu.
Diretor Nasional Ensinu Sekundariu iha ME, Benjamin Gomes da Cruz Fernandes dehan, maioria relatóriu ba konsesaun eskolar tama hotu ona. Agora foin halo fali pedidu ba trimestre rua nian.
“Hein ami nian pedidu aprovasaun husi Ministra tun mai, prosesu ba finansas hotu ona. Depois ita atribui ona konsesaun nee ba ita nian eskola sira,” dehan nia ba jornalista STL, Tersa (02/09/2025).
Nia hatete, molok ezame nasional sira fiar katak, eskola sira tenke simu osan konsesaun eskolar, tantu ba eskola sekundariu públiku no privadu hotu. ME atu atribui konsesaun nee ba eskola privadu 6 no públiku 54, hamutuk 60. Konsesaun neebe atu atribui ba eskola sekundariu jeral públiku 54 nee hamutuk US$ 423,110, ba eskola privadu 6 ho montante osan US$ 19, 900.
Iha fatin seluk, Diretor Eskola Sekundariu Jeral 10 Dezembru Komoro, Manuel Verdial hatete, relatoriu nee sira submete tiha ona ba iha Ministériu, hodi hein fali prosesu tuir mai, para bele atribui konsesaun ba eskola sira, tanba ezame nasional mos besik ona.
Jornalista: Jacinta Sequeira
Editora: Domingas Gomes
