DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisipiu Dili sei evakua okupantes neebe hela iha areador eskola iha kapital Dili, lori ba iha sira nian hela fatin.
Diretor Servisu Edukasaun Munisipiu Dili, Sabino Perreira hatete, identifikasaun ba komunidade iha areador eskola nee lao hela. Okupantes iha eskola balun fo ona notifikasaun ba sira, nee duni fim do Dezembru nee remata.
“Okupantes iha eskola balun ita fo ona notifikasaun ba sira, nee duni fim do Dezembru nee remata, tama 2026 ita prosesu sira evakua ba iha sira nian hela fatin,” esplika nia ba STL iha edifisiu ME Vila Verde, Kuarta (17/12/2025).
Sabino dehan, eskola linha mak hetan ona notifikasaun no muda sai ona sira iha areador eskola nian nee maka hanesan Eskola EBC Hera, Eskola 10 de Dezembru Komoro, EBC Bidau Akadiru-hun nomos EBC Sergio Viera de Melo Becora, agora tama ona ba iha EBF Bemori.
“Prosesu identifikasaun ba ita nian okupantes sira nee, hau hanoin prosesu hotu ita labele halo dala ida deit, maibe ita haree faze por faze, tanba ita tenke haree mos buat balun,” nia tenik.
Nia hatutan, kona-ba ba rekursu, tekniku sira neebe maka atu apoiu servisu, tanba dala ruma haree ba iha tempu no transporte, nee duni depende mos ba iha rekursu neebe prepara.
Iha parte seluk Diretor ESJ nu. 4 Setembru Balide, Sergio A. da Cruz dehan, komunidade neebe hela iha areador eskola nee too agora sei nafatin, maibe husu ba ME oinsa mak atu haree asuntu ida nee, atu nunee komunidade sira bele hamamuk eskola ida nee, dala ruma aprendizajen lao hela transporte movimentu tama sai iha areador eskola ninia.
Sergio hatutan, komunidade hirak nee desde hela iha areador eskola nee iha tinan 1999 mai nee mak too ohin loron, maibe sira nafatin kopera diak ho parte eskola no sira prontu atu sai husi areador eskola ida nee.
Jornalista: Jacinta Sequeira
Editora: Domingas Gomes
