DILI, STLTIMORLESTE.com – Ministeriu Edukasaun (ME) sei hadia eskola no sala hanorin hamutuk 1.900 iha territoriu Timor Leste (TL) laran tomak.
Lia hirak nee hatoo husi ME, Dulce de Jesus Soreas ba jornalista sira, bainhira remata partisipa asina memorandu entre Instituto Camões nomos Ministeriu Edukasaun iha EBF Farol, Dili, Kinta (03/04/2025).
“Ita sei presiza hadia tan 1.900 sala de aula inklui eskola sira neebe ita boot sira hatete nee iha Ministeriu ninia lista, Ministeriu hatene ona maibe ita halo reabilitasaun ka harii nee fazeadamente tuir orsamentu neebe aloka mai iha Ministeriu Edukasaun,” katak ME, Dulce.
Iha biba nee, Ministra mos hatoo agradese ba doador sira neebe mak apoiu hodi reablita eskola iha nasional.nomos munisipiu sira hanesan mos iha loron kuarta Prezidente Republika hamutuk ho Governu Japaun liu husi Embaixador Japaun neebe vizita eskola iha Manatuto nomos seluk tan. Kuandu hetan apoiu sira hanesan nee agradese bele hamenus liu tan problema, tanba ministeriu sei presiza hadia eskola 1.900 sala de aula.
“Se iha ema ruma ka doador ajuda ita tenke agradese nomos ita kuidadu fasilidade sira nee, atu nunee fasilidade sira nee bele uza ba aprendizajen ho diak. Hanesan hau dehan nafatin ita hetan apoiu horiseik hanesan ohin sua exelensia hatete, horiseik ita hetan apoiu husi Governu Japaun inaugura eskola ida, ohin ita hetan tan para hadia tan ita nia eskola, entau loron-loron tinan ba tinan ita kontinua hadia,” dehan governante nee.
Nunee mos Prezidente Republika, Jose Ramos Horta hatutan, setor edukasaun nee importante tebes, tanba nee oras nee Governu liu husi Ministeriu Edukasaun esforsu oinsa mak bele hadia eskola sira.
“Horiseik hau ba Soibada hamutuk ho Embaixador Japaun ba inaugura eskola foun ida iha neeba, Embaixada Japaun mak halo ohin iha nee hamutuk ho senhora Ministra no senhora Embaixadora, edukasaun sempre importante tebes, esforsu makaas husi ita nia estadu ita nia Governu no setor edukasaun sempre komplikadu iha rai barak iha mundu nee sempre komplikadu, liu-liu nasaun sira indezenvolvimentu, nee duni ita hotu buka kolabora no apoiu para benefisiu ba joven no labarik sira,” hatete PR, Horta.
(eme)
