DILI, STLTIMORLESTE.com – Iha tempu badak nia laran Ministeriu Edukasaun (ME) sei halo kolokasaun bolsa kandidatu profesores 200 resin ba nivel ensinu baziku no pre eskolar.
Tuir Diretor Nasional Rekursu Umanus ME, João Amaral ba jornalista STL iha nia knaar fatin Vila Verde, Dili, Kuarta nee (23/04/2025).
“Kona-ba ita nian bolsa sira neebe mak agora daudaun iha bolsa laran hela nee, ita sei iha 1090 mak sei iha bolsa laran hela, maibe agora daudaun husi parte rekursu umanu servisu hamutuk hela ho parte juridiku nian, ita sei iha hela tan 200 resin sei koloka iha tempu badak nia laran, tanba ami sei verifika, nee ho valor kontinuasaun neebe agora daudaun sei iha vaga, nee ita sei koloka iha tempu badak nian laran,” dehan nia.
Nia dehan, primeiru sira tenke kompriende saida mak bolsa nee, tanba bolsa nee katak, halo rekrutamentu mai bolsa hodi hein quadro pesoal sira identifika tuir eskola neebe mak menus profesores nee bele koloka ba iha neeba, tanba nee agora daudaun iha ona 200 resin neebe sei koloka iha tempu badak nian laran.
“Ami sei halo verifikasaun hela, atu nunee ita nian eskola neebe menus profesores nee ita sei koloka, 200 resin nee ita sei koloka ba iha nível ensinu baziku ho pre eskolar, loron no fulan ba kolokasaun nee hau seidauk determina agora, tanba ami sei iha linha koordenasaun neebe hanesan ohin hau mensiona,” dehan nia.
(jac)
