DILI, STLTIMORLESTE.com – Ho mandatu tinan 5 nia laran, Ministériu Edukasaun (ME) sei konstrui sala de aula hamutuk 1000 resin.
Ministru Edukasaun (ME) Interinu, Domingos Lopes Lemos dehan, ME nia prioridade nee mak hahu husi inisiu haree ba prosesu tomak, liu-liu ba infraestrutura sira.
“Primeiru ita haree ba prosesu tomak, neebe iha baze saida mak lao, liu-liu ba infraestrutura sira. Tinan-tinan ita sempre tau hela osan ba infraestrutura. Agora ekipamentus ba iha prosesu de ensinu sira dadaun ita lao hela. Ita espera katak, too tinan 5 nee ita la kobre 100%, maibe eskola lubuk mak ita nian tarjetu neebe agora dadaun iha,”afirma Ministru Domingos Lopes Lemos, ba jornalista iha salaun Ian Martin Balide, Tersa (28/10/2025).
Nia salienta, planu neebe mak ME iha kada tinan sempre konstroi sala de aula sira. Dala barak ladun haree hetan saida mak ME implementa hela, maibe realidade iha terenu prosesu ba infraestrutura nee lao makaas, maske rezolve fazeadamente.
“Ita esforsu no la taka dalan planu no programa nee tenke atinji too 100% tuir programa neebe mak ME iha, maibe fazeadamente,” nia tenik.
Nia hatutan, programa ME iha tinan 5 nee sei konstroi sala 1000 resin iha nibel teritoriu. Maske iha tinan 5 nee labele halo too tarjetu, maibe governasaun mai sei kontinua.
Jornalista: Jacinta Sequeira
Editora: Domingas Gomes
