BAUKAU, STLTIMORLESTE.com – Ministeriu Edukasaun (ME) sei reabilita edifisiu Eskola Kafe iha Aldeia Samalakuliba, Suku Builai, Postu Administrativu Baukau Vila, Munisipiu Baukau, neebe kompanhia abandona iha tinan 2018.
Diretor Servisu Edukasaun Munisipiu Baukau, Afonso dos Santos da Costa hateten, relasiona projetu konstrusaun Eskola Kafé hahu iha tinan 2013 too agora parte kompanhia abandona, ministeriu liu husi ekipa nasional hamutuk ho Diresaun Servisu Munisipal halo ona levantamentu dadus, nunee sei relata hikas ba ministeriu hodi fo solusaun.
“Tuir informasaun sira neebe mai, iha tempu badak nee ita atu kompleta rekezitu sira para fulan Maiu ba leten nee ita bele ona halo fila fali konstrusaun ou reabilitasaun,” hateten Afonso ba jornalista sira iha Samalakuliba, Baukau, Sesta (11/04/2025).
Nia sublina, Ministeriu Edukasaun orienta ona Diresaun Servisu Munisipal atu aselera kompleta rekezitu estatutu rai liu husi kontaktu ho Autoridade Suku no nain ba rai, tanba nain ba rai deklara, antes nee atribui rai hektare rua ho voluntariu ba konstrusaun refere, maibe iha akta termu entrega hektare haat.
Nunee nia argumenta, Servisu Edukasaun Munisipiu Baukau sei esforsu hodi solusiona preopasaun kona-ba rai nian iha tempu besik, nunee bele relata ba nasional hodi implementa projetu ho aselera fo espasu no eleva kualidade edukasaun, tanba durante Eskola Kafé Baukau laiha edifisiu propriu hodi utiliza edifisiu Eskola Ensinu Baziku Vila Antiga too ohin loron.
“Se ida nee reabilita, hau hanoin eleva ona kualidade edukasaun iha Baukau, tanba ita haree uza hela Eskola Ensinu Baziku nian, sira mai Baukau hein konstrusaun, mais la hotu, tan nee mak la hotu, nia impaktu ba iha kualidade edukasaun, maibe kuandu prontu ona, klaru eleva edukasaun iha Baukau,” Afonso akresenta.
Pesoal entrega rai, Marcelino Diego Marques hateten, iha tinan 2012 entrega rai ba Governu liu husi Ministeriu Edukasaun hamutuk hektare rua, hodi utiliza ba konstrusaun edifisiu Eskola Kafé iha Baukau, tanba Eskola Kafé importante atu eziste iha Munisipiu Baukau hodi eleva kapasidade estudunte iha lian português.
“Atu hadia depende ba Governu, tinan ida nee ou tinan oin, maibe prezisa tuur hamutuk koalia koordena didiak lai, tanba uma abandonadu ona, estatus rai tun sae, maibe nia estatus loos ona nee hadia,” hateten Macelino.
Sidadaun nee promete sei koopera nafatin ho Ministeriu Edukasaun bainhira iha ona planu atu kontinua projetu konstrusaun neebe abandona ho tipu reabilitasaun, maibe sujere haduluk hadia estatus rai, tanba antes nee nain ba rai entrega hektare rua, maibe iha akta hektare haat.
Nunee nia sujere, prezisa Ministeriu Edukasaun liu husi Servisu Munisipl atu koordena ho nain ba rai, maibe atu kontinua projetu nain ba rai nafatin apoiu, tanba setor edukasaun importante ba Timor Leste.
Enkuantu nain ba rai entrega rai ba Governu iha tinan 2012 ho voluntariu.
(tom)
