DILI, STLTIMORLESTE.com – Ministeriu Edukasaun (ME) hamutuk ho Sekretariu Estadu ba Igualdade (SEI) kontinua halo sosializasaun ba inan aman sira, nunee lori fila labarik neebe para eskola nomos feto neebe gravida bainhira partus bele fila hikas ba eskola.
Kestaun nee hatoo husi Rita Francisca da Cruz Gomes, Xefe Departamentu Ministeriu Edukasaun no hanesan mos Embaixadora Asuntu Igualdade Jeneru ba jornalista sira iha Hotel Timor, Tersa (24/06/2025).
Nia hatete, Ministeriu Edukasaun servisu hamutuk ho SEI kontinua halo sosializasaun ba komunidade sira, nunee bele lori fila labarik neebe para eskola nomos feto neebe isin rua bainhira partus bele fila hikas ba eskola.
“Ita koalia kona-ba programa politika fila hikas ba eskola, ami husi Ministériu Edukasaun halo nafatin sosializasaun oinsa politika fila hikas ba eskola bele reforsa no kontinua dezenvolve hela pratika oinsa atende alunus sira, karik iha alunus feto balun gravida oinsa fila hikas ba eskola no oinsa labarik sira neebe drop out ou sai ona eskola, oinsa Ministeriu edukasaun ba halo aprosimasaun ho inan aman, oinsa labarik sira fila hikas ba eskola,” dehan Xefe Departamentu ME.
Rita hatete, Ministeriu Edukasaun halo aprosimasaun ba inan aman oinsa haruka labarik sira neebe para eskola bele kontinua sira nia eskola no sira neebe isin rua para eskola bainhira partus bele fila hikas ba eskola.
“Liu-liu mak iha area rurais sira, Ministeriu Edukasaun liu husi programa ida mai husi Deklarasaun Maubisi konsege halo progresu balun liga ho politika fila hikas ba eskola, no oinsa ami halo aprosimasaun ho inan aman nomos aprosimasaun ho eskola sira, nunee oinsa labarik sira neebe para no sira neebe isin rua sedu bele fika hikas ba eskola,” katak nia.
Nia hatete, sira dezenvolve hela hodi fasilita estudante sira liu husi aprosima inan aman ho eskola sira nunee sira bele fila hikas ba eskola hodi tuir prosesu aprendizajen.
“Ami mos halo advokasia ho inan aman no eskola nunee bele haruka oan feto sira neebe gravida bainhira partus bele fila hikas ba eskola, Ministeriu Edukasaun halo advokasia nafatin hodi fo oportunidade ba ssira fila fali ba eskola hodi tuir prosesu aprendizajen,” katak nia.
Ho programa politika fila hikas eskola ho aprosimasaun husi Ministeriu Edukasaun no SEI neebe halo, oras nee lori fila labarik neebe para eskola nomos feto neebe gravida fila hikas ba eskola nee maizumenus numeru hira ona mak tama fali eskola, hatan ba kestaun nee parte Edukasaun fo respota katak sira iha dadus maibe depois mak fornese tanba numeru nia ladun akapta.
Nunee mos Sekretaria Estadu ba Igualdade, Elvina Sousa Carvalho hatete, IX Governu Konstitusional liu husi Sekretariu Estadu ba Igualdade hamutuk ho parseru nafatin luta makaas hodi bele implementa programa politika fila hikas ba eskola.
Nunee mos Visi Embaixador Australia ba Timor Leste, Edward Willson hatete, Governu Australia orgulhu servisu hamutuk ho Governu Timor Leste liu-liu ho SEI hodi haree kona-ba asuntu igualdade jeneru.
“Governu Australia iha kompromisu atu apoiu kresimentu ekonomika inkluzivu inklui igualdade jeneru iha aspetu hotu-hotu ba programa dezenvolvimentu no fo apoiu ba ema marzenalizadu inklui ema ho defisiensia empodera feto importante tebes ba Timor Leste no prospriedade no sustentavel,” katak Visi Embaixador.
(eme)
