DILI, STLTIMORLESTE.com – Ministeriu Edukasaun (ME) sei halo lansamentu farda eskola iha semana nee nia laran, ho kustu neebe minimu, atu nunee sei la sai todan ba inan aman estudante sira.
Kestaun nee hatoo husi Ministra Edukasaun (ME), Dulce de Jesus Soares ba STL iha edifisiu ME Vila Verde, Tersa nee (17/12/2024).
“Ezemplu ita halo farda leten nee mutin, atu fasil liu inan aman sira bele sosa iha fatin sira neebe deit, ita hatene katak, agora iha ita nian rai nee iha fatin sira neebe mak sosa hena ho baratu, entaun ita hein katak, kuandu ita lansa nee dala ida tan atu la sai todan ida ba inan aman sira, tanba nee fulan nee ita sei halo lansamentu ba farda eskola,” dehan nia.
Governante nee hatutan, uniforme eskolar sei iha prosesu nia laran, ita espera katak iha semana nee nia laran bele halo lansamentu, hodi publiku bele hatene, nunee eskola sira bele halo preparasaun iha inisiu de anu letivu, maibe nee laos buat ida sei la afeita ba prosesu aprendizajen, no hakarak haree situasaun nee hakmatek, farda neebe mak lansa nee ho kustu neebe mak minimu, atu nunee sei la sai todan ba komunidade sira hotu.
(jac)
