DILI, STLTIMORLESTE.com – Tinan nee Ministeriu Edukasaun (ME) sei sosa komputador 300 resin ba Eskola Sekundariu Jeral (ESJ) ho nia total orsamentu rihun US$ 500.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha nia knaar fatin Vila Verde, Sesta nee (14/03/2025).
“Agora pedidu foin atu ba iha ministra, tuir planu nee ami atu fo 300, nee ita sosa ba iha ensinu sekundariu jeral, nee planu ami sei sosa iha tinan ida nee, ba ensinu sekundaria nee ho projetor hotu orsamentu hamutuk rihun US$ 500, agora ba ensinu tekvo ninia kuantidade komputador mak hau ladun hatene, maibe ninia orsamentu atu sosa komputador ba tekvo nee hamutuk US$ 400 mil,” nia esplika.
Iha fatin seluk, Adjuntu Diretor Eskola Hotelaria no Turizmu Bekora, Charles F. Guterres hatete, fasilidade hanesan kustura, se estudantes 30, entaun ninia makina suku nee agora daudaun sia deit, nee presiza halo ba grupu, tanba estudantes 30 ba hotu nee labele, tanba makina iha sia deit, estudantes labele tama hotu ba iha sala pratika ninia, nee sira tenke halo fazeadamente.
“Kona-ba fasilidade komputador nian ami seidauk hetan apoiu ida, difikuldade kona-ba estudantes sira ninia pratika nee mak numeru estudantes nee boot, nee estudantes sira presiza tau iha grupu, depois grupu ida uluk tiha, hotu grupu ida seluk tama pratika fali, neebe sira halo pratika troka malu deit, kuandu ba hamutuk hotu nee labele, tanba fasilidade seidauk sufisiente,” dehan nia.
Nia hatutan, departamentu ida seluk kona-ba hotelaria, nee mos agora daudaun sira halo pratika iha sala kiik ida, tuir lo-loos departamentu hotelaria nee tenke iha ninia mini hotel ida, atu nunee estudante sira bele halo pratika, maibe tanba infelizmente agora daudaun sira uza sala kiik ida halo pratika.
“Departamentu kustura ninia nee ami iha makina suku roupa nee sia deit, nee mos makina ida uluk manual nee, makina modelu nee foin iha rua deit, ba departamentu kulinaria nee too agora seidauk iha sala pratika propriu, maibe uza deit ninia kitchen nee mak uza ba halo pratika,” tenik nia.
(jac)
