DILI, STLTIMORLESTE.com – Maske Servisu Edukasaun Munisipiu Likisa hatama ona pedidu husu apoiu guarda eskola ba Ministeriu Edukasaun (ME), maibe seidauk hetan aprovasaun.
Lia hirak nee hatoo husi Direitor Servisu Edukasaun Munisipiu Likisa, Julio da Silva ba jornalista STL liu husi telefone, Domingu nee (04/05/2025).
“Ita nian eskola 11 iha Munisipiu Likisa mak iha guarda eskola no ita nian pre eskolar nee laiha guarda, sekundariu jeral nee ida deit, nee guarda ida deit, tekvo mos guarda eskola ida deit, eskola katolika nee sira rasik mak prepara guarda eskola. Ba asuntu nee nuudar Diretor Edukasaun Munisipal halo ona pedidu ba ME, maibe seidauk aprova ida, ita koalia beibeik maibe seidauk iha rejultadu, pedidu nee ita hatama iha tinan kotuk,” tenik nia.
Julio dehan, guarda nee ladun prioridase ida, total eskola iha Munisipiu Likisa, ensinu baziku hamutuk 56, pre eskolar 38, sekundariu jeral nee 8, tekvo iha 2, eskola hirak nee 11 mak iha guarda eskola.
Iha fatin seluk, Diretor Servisu Edukasaun Munisipiu Ainaro, Patricio da Costa Magno esplika, eskola 42 neebe lokaliza iha Munisipiu Ainaro too agora seidauk iha guarda eskola, tanba eskola baziku 8 deit mak iha guarda. Eskola 42 hahu kedas husi inisiu too agora seidauk iha guarda eskola, maibe oinsa mak atu rezolve situasaun ida nee, nunee iha tinan nee bele rezolve ida rua, maibe haree liu ba iha eskola ida neebe mak importante liu ou sai risku liu.
“Hau hanoin kona-ba guarda eskola iha Munisipiu Ainaro nee ita iha ensinu baziku 8 mak iha guarda eskola, iha ensinu sekundariu no tekvo ita kontratu ona, maibe seluk too agora ita seidauk iha guarda eskola. Eskola ensinu baziku 8 iha Munisipiu Ainaro mak iha guarda eskola no eskola seluk nee too agora seidauk iha guarda, nee duni eskola 42 seidauk iha guarda eskola,” katak nia.
(jac)
