DILI, STLTIMORLESTE.com – Ministeriu Edukasaun (ME) seidauk atribui osan konsesaun eskolar ba Ensinu Sekundariu Jeral (ESJ), tanba too agora seidauk submete sira nian relatoriu konsesaun 2024 ba ministeriu.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha nia knaar fatin Vila Verde, Kinta nee (27/03/2025).
“Bazeia ba relatoriu neebe mak sira hatama mai ami, tanba relatoriu konsesaun tinan kotuk ninia nee ba Ensinu Sekundariu Jeral hotu-hotu, atu nunee ita bele fo konsesaun foun ba sira, primeiru sira tenke submete lai relatoriu konsesaun tinan kotuk nian nee mai ami, ho nunee ami foin bele fo. Neebe mak seidauk hatama relatoriu nee mak husi Munisipiu Vikeke, Baukau, Manatuto, Lautem no Munisipiu Ermera, sira nee relatoriu seidauk hatama hotu mai,” nia esplika.
Nia dehan, bainhira relatoriu nee hatama hotu mai mak sira foin bele atribui fali konsesaun foun ba tinan nee fo ba sira, maibe ninia prosesu nee lao hela, tanba nee bainhira sira hatama relatoriu mai mak foin hatoo ba sira, no husi ME seidauk bele atribui konsesaun eskolar ba sira idak-idak nia konta bankaria, tanba ho razaun seidauk simu relatoriu mai husi eskola neebe ohin mensiona munisipiu.
Iha parte seluk, Diretor ESJ nu. 4 de Setembru Balide, Sergio A.da Cruz dehan, kona-ba osan konsesaun eskolar ba tinan ida nee seidauk tama, maske ezame primeiru periodu iha tempu badak realiza ona.
“Kona-ba konsesaun ba tinan nee seidauk tama, maibe ami husi parte eskola nian hein deit, bainhira mak konsesaun nee tama iha ami nian konta bankaria eskola nian,” nia dehan.
(jac)
