DILI, STLTIMORLESTE.com – Ho informasaun bolsa kandidatu profesores nain 20 neebe hanorin iha eskola Munisípiu Bobonaro muda fatin hanorin ba fali sira nian munisípiu, parte Ministeriu Edukasaun (ME) Nasional seidauk simu informasaun husi Edukasaun Munisípiu.
Haktuir Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes ba jornalista STL iha Vila Verde, Segunda nee (09/02/2026).
“Kona-ba bolsa kandidatu profesores muda fatin nee ami seidauk simu informasaun, la hatene keta parte husi rekursu umanu Ministeriu Edukasaun nian simu ona ka lae, nee duni ami seidauk simu informasaun ida nee, tanba informasaun ida nee ami seidauk hatene,” tenik nia.
Entretantu Diretor Nasional Rekursu Umanu iha Ministeriu Edukasaun, João Amaral ninia parte seidauk bele fo komentariu kona-ba asuntu ida nee, tanba presiza konfirma fali ho parte Diretor Servisu Edukasaun Munisipiu Bobonaro.
Nunee mos Diretor Servisu Edukasaun Munisipiu Bobonaro, Miguel Freitas dehan, bolsa kandidatu nain 20 nee laos muda ba eskola neebe lokaliza iha Munisípiu Bobonaro nia laran, maibe sira idak-idak muda fali ba sira nian munisípiu, la hatene sira liu husi meus ida neebe hodi fila ba sira nian munisípiu, tanba husi Edukasaun Bobonaro rasik la hatene ida nee.
“Ita nian bolsa kandidatu profesores nee mos ami halo identifikasaun nafatin, maibe seidauk hotu, tanba balun muda ba fatin seluk, maibe laiha konhesimentu liu husi Edukasaun Munisípal, la hatene sira liu husi meus ida neebe mak fila fali ba sira nian fatin nee, nee mak ami atu buka tuir sira nee mak kusta oituan, ita bele dehan bolsa kandidatu profesores nain 20 nunee mak muda ba sira nian fatin no laiha konhesimentu husi ami,” katak nia.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, SEM Munisípiu laiha kompetensia atu muda bolsa kandidatu profesores sira, tanba iha Ainaro profesor ida mak husu atu muda fatin tanba ho kondisaun saude iha rai malirin la tahan.
“Hau hanoin SEM Munisípiu laiha kompetensia atu muda bolsa kandidatu profesores sira, tanba iha Ainaro Profesor ida mak husu atu muda fatin tanba ho kondisaun saude iha rai malirin la tahan, nee duni nee kompetensia husi Ministeriu Edukasaun Nasional,” nia informa.
(jac)
