DILI, STLTIMORLESTE.com – Ministeriu Edukasaun (ME) husi Diresaun Nasional Edukasaun Inkluzivu Asaun Sosial Eskolar (DNEIASE) servisu hamutuk ho parseiru sira, liu-liu asosiasaun neebe haree ba asuntu ema ho defisiensia sira nian.
Kestaun nee hatoo husi Direitor Nasional Edukasaun Inkluzivu Asaun Sosial Eskolar (DNEIASE), Fernando Soares ba STL iha nia knaar fatin, Kuarta nee (23/10/2024).
“Ita la lao mesak, tanba ita mesak labele halo buat ida, maibe durante nee ita halo koordenasaun ho parseiru sira hotu, liu-liu Assosiasaun Defisiensia sira nian hanesan ADTL no parseiru sira seluk neebe tau matan ba iha asuntu defisiensia ninia, apoiu tebes-tebes ME, nomos ita sempre halo koordenasaun ho sira hodi fo formasaun ba ita nian funsionariu sira, antes sai ba liur nee, ita nian funsionariu sira tenke hatene saida mak sira atu halo,” nia deklara.
Fernando dehan, funsionariu sira tenke hatene saida mak inkluzivu nee, ho nunee bele halo atendimentu neebe mak diak ba defisiensia sira, tanba nee sira kontinua halo koordenasaun neebe diak ho parseiru sira.
Iha fatin seluk, Diretor Ezekutivu ADTL, Cesario da Silva hatete, ADTL mos sempre servisu hamutuk ho parte relevantes sira hanesan ME no parseiru seluk neebe atu haree ba assuntu ema ho defisiensia sira nian.
(jac)
