DILI, STLTIMORLESTE.com – Kada loron Ministériu Edukasaun (ME) liu husi Rekursu Umanu Nasional kontinua simu profesores sira nian karta rekerimentu atu tama idade reforma husi Servisu Edukasaun Munisipiu (SEM) sira.
Lia hirak nee hatoo husi Direitor Rekursu Umanu Nasional iha ME, João Amaral ba jornalista STL iha nia knaar fatin Vila Verde, Segunda nee (28/07/2025).
“Ita nian profesores reforma sira nee, ida neebe mak sira nain lori karta rekerimentu nee, no ida neebe mak tama ona ba idade reforma tuir lei obrigatoriu nee ita iha 1 456, nee la presiza sira hatama pedidu, maibe nee otomatikamente, ida neebe mak hanesan idade 60 ba leten, sira hakarak reforma nee, nee laiha problema ida, sira bele hatama karta rekerimentu, tanba agora daudaun ami prosesu hela tuir sira nian rekerimentu sira nee no sira lori mai nee ita prosesu ona,” nia esplika.
Nia dehan, profesores sira nian karta rekerimentu nee rekere ba iha SEM, depois mak husi SEM submete mai iha Rekursu Umanu Nasional, tanba nee kada loron nee numeru profesores neebe hakarak atu reforma, lori sira nian karta rekerimentu nee sempre aumenta, nee ho profesores idade 60 ba leten sira nee.
“Ita nian profesores sira neebe mak nain rekere mai nee tanba sira nain mak rekere nee, entaun sira rasik duni mak hakarak duni atu reforma no laos ita mak obriga sira, maibe ida neebe mak obrigatoriu nee ho idade 60 ba leten tuir lei haruka nee, agora sira neebe nain mak rekere mai nee, nee laos obrigatoriu,” katak nia.
(jac)
