DILI, STLTIMORLESTE.com – Ministeriu Edukasaun (ME) liu husi rekursu umanu nasional submete ona dadus profesores moras prelongada 200 ba Komisaun Funsaun Públika (KFP).
Diretor Nasional Rekursu Umanu iha ME, Joao Amaral dehan, dadus neebe identifika submete ona ba KFP, hodi haruka ba iha INSS hasai desizaun.
“Dadus 200 mak ita submete ona nee, tanba hela 50 Munisipiu Dili ninia deit ona. Nee duni 200 mak ita submete ona ba iha KFP. Dadus neebe mak ita submete ona ba KFP nee rekolha ona husi Munisipiu hotu. Bainhira submete ona hein desizaun sai, sira deskansa iha uma deit ona, ho nunee halao tratamentu ba sira nia saude,” afirma nia ba STL, Tersa (21/10/2025).
Joao akresenta, iha profesor balun ninia rezultadu husi mediku seidauk kompletu, nee presiza haree didiak lai, tanba servisu hamutuk ho INSS iha baze nee tenke prienxe rekezitus. Tanba iha grau um too grau três, grau um nee sekarik nia rekopera fila fali, nia bele servisu, karik la diak ona mak kontinua ba iha grau três, atu nunee bele halao ninia tratamentu.
Nia hatutan, dadus nee los ona, maibe balun junta mediku seidauk mai. Munisipiu Dili ninia seidauk halao, tanba agora daudaun sei okupadu ho ezame nasional, depois de ida nee mak kontinua rekolha fali iha Munisipiu Dili.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prelongada nee dadus haruka ba ona iha rekursu umanu nasional.
Jornalista: Jacinta Sequeira
Editora: Domingas Gomes
