DILI, STLTIMORLESTE.com – Ministeriu Edukasaun (ME) liu husi Gabinete Avaliasaun Lisensiamentu no Akreditasaun (GALA) suspende hela lisensiamentu ba Eskola Internasional no la simu aplikasaun.
Haktuir Kordenador GALA, Antonio Tomas Maia ba jornalista STL iha nia knaar fatin Vila Verde, Dili, Segunda nee (05/05/2025).
“Seidauk simu pedidu husi eskola internasional sira, tanba eskola internasional sira ita suspende hela lisensiamentu, tinan nee la simu aplikasaun. Depende kuandu despaxu ministerial suspensaun nee revoga fali. Kona-ba monitoring ba eskola internasional iha munisipiu sira, agora ita monitoring ba Vikeke no Lautem, Lautem Eskola Internasional 1, Vikeke Eskola Internasional 1,” nia dehan.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintão dehan, eskola internasional iha Manatuto nee balun hetan ona lisensa husi GALA no balun seidauk, tanba nee Ministeriu Edukasaun liu husi GALA mak iha kompetensia halo kontrolu ba eskola sira nee.
“Kona-ba fo lisensa ba ita nian eskola sira nee kompetensia husi Ministeriu Edukasaun liu husi GALA, tanba sira mak halo kontrolu ba ita nian eskola sira, nee duni oinsa mak ita nian eskola sira nee bele prienxe kriteria, atu nunee halao prosesu ensinu aprendizajen ba ita nian estudantes sira,” dehan nia.
Nunee mos Diretor Servisu Edukasaun Munisipiu Ainaro, Patricio da Costa Magno dehan, Eskola Internasional iha Munisipiu Ainaro balun hetan ona lisensa husi Ministeriu Edukasaun no balun mak seidauk hetan, tanba ida nee husi nasional mak fo lisensa ba sira.
“Hau hanoin ita nian Eskola Internasional iha Munisipiu Ainaro balun hetan ona lisensa husi Ministeriu Edukasaun no balun mak seidauk hetan, tanba ida nee husi nasional mak fo lisensa ba sira,” nia komenta.
(jac)
