DILI, STLTIMORLESTE.com – Ministeriu Edukasaun (ME) verifika dadus aplikantes bolsa kandidatu profesores ba nível sekundariu neebe mak pasa ona iha teste refere.
Haktuir Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Dili, Segunda nee (23/06/2025).
“Agora daudaun iha faze verifikasaun ba dadus aplikantes bolsa kandidatu profesores neebe mak pasa ona iha teste nee, tanba ami sei identifika ba sira neebe aumenta 10 pontus nee, no ba sira neebe mak orsida ami aprezenta ba diresaun ensinu relevante neebe iha bolsa nee, ho diretor nasional sira, bainhira los ona ami sei aprezenta ba excelencia nain rua,” dehan nia.
Nia dehan, aplikantes 1094 mak pasa ona iha teste ida nee, nee kompostu husi teste jeral no teste espesiál ba eis profesores kontratu 2023, tanba teste nee hahu halao iha loron 19 fulan Maiu too iha loron 17 fulan Junhu tinan nee, no agora daudaun iha faze verifikasaun nian laran.
Iha fatin seluk, Leonita Maia hanesan aplikantes Bolsa Kandidatu hatete, nuudar aplikantes neebe mak hola parte ona iha teste nee, maske la pasa iha teste maibe agradese nafatin, no karik ba oin mak ME sei kontinua rekrutamentu bolsa nee kontinua halo teste nafatin, foin daudaun nee la pasa tanba valor mak la too.
“Hau nuudar aplikantes neebe mak hola parte ona iha teste nee, maske la pasa iha teste maibe agradese nafatin, no karik ba oin mak ME sei kontinua rekrutamentu bolsa nee kontinua halo teste nafatin, foin daudaun nee la pasa tanba valor mak la too,” nia afirma.
Nia hatutan, maske la pasa teste iha bolsa kandidatu nee, maibe kontente nafatin, ba oin sei kontinua teste, tanba liu ou la liu mos laiha buat ida, tanba valor mak la too hodi la pasa iha teste refere.
“Buat teste vaga nee ita koko sorti deit, tanba ema barak mak tuir teste nee, pasa ou la pasa nee normal,” nia afirma.
(jac)
