DILI, STLTIMORLESTE.com – Media nasional haat (4) kompostu husi Media Suara Timor Lorosae (STL), Timor Post (TP), Dili Post (DP) no Independente hatoo preokupasaun neebe mak sira hasoru ba Prezidente Republika (PR), Jose Ramos Horta.
Bainhira remata hasoru malu, reprezentante Media 4, atual Diretora Ezekutiva Timor Post, Santina de Aroujo ba jornalista sira iha Palasiu Prezidensial Nicolau Lobato, Bairo Pite, Kuarta nee (22/10/2025) hatete, ohin mai hatoo preokupasaun neebe mak media sira hasoru ba Prezidente Republika.
“Ohin ami mai hasoru exelensia Prezidente Republika, ami hatoo preokupasaun neebe mak daudaun nee ami media 4 enfrenta husi Timor Post, STL, Indepedente, nomos Dili Post, ami haree katak tempu ida agora nee ami hetan difikuldade neebe mak aas oituan iha tempu ida nee, entaun ami hatoo ami nia pedidu ida mai Prezidente Republika para ami hasoru malu ho Prezidente, maibe iha sinal ida pozitivu tebes husi Prezidente no ami nain 4 husi media 4 nee sente haksolok ho promesa sira neebe Prezidente hatoo mai ami,” katak Santina.
Nia esplika, iha hasoru malu nee Prezidente Republika promete katak sei apoiu media 4 iha tempu besik, maibe sei haree mos ba orsamentu husi Prezidensia Republika nian.
“Prezidente promete katak nia sei apoiu ami iha tempu besik, nia sei haree ba orsamentu Prezidente nian, bainhira osan nee iha sei apoiu media 4 neebe mai hasoru, aleinde ida nee mos nia sei komunika ho nia koneksaun internasional sira oinsa mak bele haree hodi apoiu media, liu-liu media 4 neebe ohin mai hasoru Prezidente,” dehan nia.
Iha biban nee Prezidente Republika Jose Ramos Horta husu media 4 atu idak-idak halo proposta hodi hatoo preokupasaun ou tuir nesesidade neebe mak media idak-idak hasoru hodi hatoo direita ba Xefe Estadu.
Bainhira simu ona proposta husi media 4 nee Prezidente Republika rasik sei buka solusaun oinsa mak bele fo apoiu ba media 4 nee.
Prezidente Republika mos promete katak iha orsamentu 2026 sei koloka balun mos ba media, tanba oras nee daudaun Prezidente foka ba ASEAN.
Diretora Timor Post nee akresenta, iha tempu badak media 4 nee sei hatoo preokupasaun no nesesidade neebe mak sira hasoru ba Xefe Estadu.
“Iha tempu badak ami sei hatoo ami nia proposta, tanba ohin Prezidente husu lalais diak liu tan, nunee bele haree ba orsamentu 2026 nia, tanba ami sente katak ho situasaun ida agora daudaun hakat ba 2026 nee araska, tanba promete sira neebe mak iha media sira nee sei haree fali ba 2027, entaun ami sente katak tempu ida agora nee ami araska, ho ida nee mak ohin ami mai hasoru Prezidente hatoo preokupasaun hotu atu nunee Prezidente mos bele tau matan mai ami,” dehan nia.
Nia fundamenta, daudaun nee media 4 hasoru hela preokupasaun tanba menus rendimentu, entaun susar atu sosa material, ba emprime mos sai difikuldade.
“Tempu ida agora Governu ladun monta ona publisidade ba iha media sira, aleinde ida nee Governu mos ladun sai kliente hanesan uluk, entaun ami sente katak orsamentu neebe ami hetan menus los maske ami la dehan katak Governu la apoiu ami, ami sente katak Governu apoiu ami maibe apoiu neebe Governu fo nee ami sente katak la sufisiente para haree ba nesesidade neebe ami kompanhia sira enfrenta hela daudaun,” hakotu nia.
Jornalista: Emerenciana Pinto
Editor: Xisto Mendonça
