DILI, STLTIMORLESTE.com – Media sosial laos plataforma ba violensia, maibe tenke sai fatin ida atu fahe inspirasaun, informasaun no apoiu, laos fatin ida atu insulta ka hatun ema seluk.
Liafuan nee STL sita husi pajina ofisial rede sosial Fokupers Timor Leste, Kinta (19/02/2026).
Iha pajina nee katak, media sosial labele uza hodi insulta malu, labele uza atu habelar odiu no labele uza hodi halo moe ema neebe hasoru ona violensia, tanba komentáriu hotu-hotu iha impaktu no publikasaun ida-idak bele hakanek ka hakbiit.
“Se ema ida sai vitima ba violensia, saida maka sira presiza maka empatia no apoiu, laos julga. Mai ita uza media sosial ho matenek hanesan, hanoin uluk molok fo komentariu, ️ labele fahe konteudu violentu, labele fo kulpa ba vitima no relata intimidasaun,” dehan nia.
Ho ida nee mai harii espasu dijital ida neebe seguru, dignu no respeitu ba ema hotu.
Iha sorin seluk, Estudante UNTL, Lorenca Goncalves dehan, nuudar estudante iha universitariu nia parte komprende katak media sosial sai ona parte importante ida ba ema nia moris lor-loron, tanba media sosial laos deit uza atu komunika ho kolega no familia maibe uza atu bele aprende buat foun ruma no hodi dezenvolve aan.
“Hau kompriende katak, media sosial sai ona parte importante ida ba ita nia moris lor-loron. Media sosial laos deit uza atu komunika ho kolega no familia maibe uza atu bele aprende buat foun ruma no hodi dezenvolve hau aan. Tanba nee importante tebes atu uza media social ho maneira neebe diak no loos,” dehan nia ba STL.
Tuir nia, media sosial laos uza hodi trata ema seluk no uza hodi insulta malu, maibe media sosial atu fahe informasaun, hodi fo inspirasaun no fo hanoin neebe positivu. Alende nee bainhira uza media sosial, labele halo media sosial mak domina liu fali ema, tanba dala barak bainhira uza media sosial halua tiha aan atu estuda, servisu no snuat seluk tan.
“Hau tau iha hau nia hanoin katak hau mak utiliza media sosial, laos halo fali media social mak domina hau-an. Tanba dala barak ita uza media sosial sala, ita bele haluha aan atu estuda no halo serbisu no seluk tan. Tanba nee hau tenke uza media social ho diak, atu nunee aprende buat neebe pozitivu hanesan buka Informasaun pozitivu, no dezenvolve hau nia koñesimentu iha aspetu oioin neebe hau hetan, no mos bele ajuda hau iha edukasaun hanesan buka material estudu no video edukativu sira,” dehan nia.
Nia hatutan, media sosial nee ajuda tebes hodi buka informasaun, maibe balun uza media sosial mak la tuir dalan neebe diak no lo-loos.
(dom)
