DILI, STLTIMORLESTE.com – Tuir planu, aban (08/10/2025) delegasaun husi membru FALINTIL-Forsa Defeza Timor Leste (F-FDTL) sei desloka ba iha nasaun Australia hodi partisipa jogu desportiva amizade hasoru forsa armada sira husi Australia nian.
Xefe Ekipa delegasaun F-FDTL, Tenente Koronel Abel da Costa Xavier “NIKI” hateten, Komando F-FDTL simu konvite husi Forsa Armada Austalia nia hodi ba hola parte iha jogu amizade neebe sei realiza iha nasaun Australia.
“Ami ekipa neebe mak agora iha nee husi delegasaun Timor Leste nian, liu-liu iha instituisaun F-FDTL kompostu husi ekipa rua feto no mane, neebe mak atu aranka ba iha Australia Brisbeng partisipa joga amizade entre forsa armadas Australia nian,” hatete Xefe Ekipa delegasaun F-FDTL, Tenente Koronel Abel da Costa Xavier “NIKI” ba jornalista sira liu husi konferensia imprensa, iha kuartel F-FDTL, Fatuhada, Tersa (07/10/2025).
Nia esplika, jogu desportiva nee hanesan jogu amizade entre forsa armada Australia nian, maibe sira konvida mos F-FDTL hodi partisipa jogu amizade neebe sei hahu husi 11 too 18 Outubru 2025.
“Ekipa neebe mak atu aranka nee feto no mane, sira ba sei tama iha kampu futebol boot hodi hola parte iha jogu amizade ne’e. Entaun efetivu neebe mak ami aranka hamutuk nain 38 kompostu jogador feto no mane hamutuk 33, treinador nain 2 no media ida no atan oan hau rasik”, nia imforma.
Nia fundamenta, iha eventu jogu desportiva amizade refere hamutuk ekipa 20 husi sira Australia feto no mane 18, no feto no mane husi F-FDTL ba tan kompleta hamutuk 20.
“Sira konvida ita sai nasaun ida neebe mak espesial ba eventu liga joga kompetisaun militar nian iha Brisbane Australia nian. Sira konvida ita hanesan espesial, sira la konvida nasaun seluk hanesan Nova Zelandia, maibe sira konvida de’it ita, tanba nee ita nia parseiru sira konvida ita partisipa iha eventu jogu desportiva nee,” nia relata.
Koronel nee konsidera, jogu desportiva nee hanesan kontinuasaun ida neebe foin lalais forsa armada Australia nian mai joga hasoru ona membru F-FDTL sira iha ambitu komemorasaun loron INTERFET nian.
“Ekipa Australia foin lalais mai joga hasoru ita nee mak, aban ita sei aranka ba Australia joga hasoru fali sira neebe foin lalais mai nee, sira ekipa ida primeiru divizaun nian,” nia dehan.
Nia haktuir, ekipa forsa armada Australia foin lalais mai partisipa jogu amizade iha estadiun Munisipiu Dili manan ekipa F-FDTL ho penalti, nunee espera ekipa F-FDTL sei manan fali sira iha eventu jogu desportiva amizade realiza iha Australia.
“Ita garantia manan fali sira, tanba ita sai husi nasaun ida ba nasaun ida, ita tenke foti ulun manan, laos ita lakon iha né’e ba lakon nafatin”, nia espera.
Nia informa, jogu desportiva refere konserteza hametin liu tan kooperasaun amizade entre F-FDTL ho Forsa armada Australia nian, tanba ezersisiu barak mak parte rua halo hela.
“Tanba nee jogu ida nee hanesan amizade ida, laos dehan katak ita ba foti piala dunia, maibe iha mos taxa balu neebe mak ita manan, ita fila lori”, nia koalia.
Nunee, nia relata, teknikamente membru F-FDTL ba ekipa selesaun jogador sira nee halao treinamentu durante fulan tolu nia laran molok aranka ba iha Australia.
“Ita garante katak jogu nee sei manan, tanba selesaun sira neebe hamriik iha ne’e mesak timnas hotu deit neebe mak antes sira tama mai forsa, sira partisipa ona iha jogu oin-oin no hanesan jogador iha klubu sira,” nia konklui.
Iha fatin hanesan, Asesor Senior Kuarter Jeral Forsa Defeza Australia, Tenente Koronel, Eric Bettanin hatutan tan katak, jogu desportiva amizade entre forsa armada Australia no Timor Leste nee espesial tebes.
“Entaun ekipa 20 husi Australia no ekipa rua feto no mane husi F-FDTL ba partisipa hanesan konvidadu espesial, tanba jogu nee Australia konvida deit F-FDTL, la konvida nasaun seluk hanesan Nova Zelandia no seluk”, nia esplika.
Nia haktuir katak, Forsa Defeza Australia iha amizade metin ho Timor Leste liu-liu ho F-FDTL dezde tempu funu segunda guera mundial no INTEFET no kooperasaun iha programa defeza no ezersiziu barak halo ona no mos jogu amizade refere no ba futuru kontinua harii amizade.
Jornalista: Jeniche da Costa
Editor: Xisto Mendonça
