DILI, STLTIMORLESTE.com – Komando FALINTIL-Forsa Defeza Timor Leste (F-FDTL) realiza atividade treinamentu demonstrasaun individual neebe halao husi Militar Treinamentu Operasaun Apoiu Pas nian ba Membru F-FDTL, neebe husi komponente idak-idak.
“Ita nia objetivu ba treinamentu demonstrasaun individual nee sira prepara wainhira ita tama ASEAN karik atu sai ba observador ninia,” hatete Komandante Forsa Apoiu Jeral F-FDTL, Koronel Celestino Pinto ‘DAELEBA’ ba jornalista sira iha Metinaro, Kinta (10/04/2025).
Nia dehan, sira nia treinamentu nee durante semana sanulu ona, laos diak liu ona, maibe diak no ba futuru tenke kontinua no treinamentu nee importante tebes.
“Imi treinu semana sanulu ona, no aban enseramentu ona, maibe hau husu treinamentu neebe Komandate sira fo nee para hodi prepara ita boot sira, no labele haluha treinamentu neebe ohin Komandante sira fo, nee hanesan bukae ida, hodi imi lori too iha imi nia Komponente neeba, no hau fiar katak Komponente sira sei perepara ita boot sira hodi kontinua treinamentu diak liu tan,” nia informa.
Iha fatin hanesan, Komandante Sentru Instrusaun Komandante Nicolau Lobato, Tenente Koronel Eugénio Guterres “TOFA” esplika, formasaun no treinamentu hotu tantu baziku too avansadu, tanba nee Sentru Internamentu Apou Paz agora daudaun perepra ona membru F-FDTL husi Komponente idak-idak atu tuir treinamentu tiru.
“Ita nia meus no kondisaun mak hanesan nee, ita lao tuir ida nee, mais kuandu ita nia kondisaun diak, ita kuandu pratika tau duni ba real para aban bainrua kumpri misaun nee ho diak,” nia deklara.
Nia hatutan, parseiru Australia sira sempre apoiu Komando F-FDTL, tanba sira iha devér para apoiu Instituisaun F-FDTL ida nee.
“Ita boot sira prepara diak no treinu diak, bainhira kuandu bukae iha ona ita bele ba kontribuisaun, ita treinu atu halo saida, atu minimiza risku, kuandu ita lakohi treinu mak risku ba ita nee boot,” nia informa.
Tenente Koronel Eugénio husu militar sira tenke treinu ho seriu, tanba Instituisaun F-FDTL konfia ba militar sira, Unidade Komponente mos konfia, nasaun no Governu mos fo konfiansa ba membru F-FDTL sira, tanba nee treinu simples maibe nia risku nee boot.
(jen)
