DILI, STLTIMORLESTE.com – Membru FALINTIL-Forsa Defeza Timor Leste (F-FDTL) liu husi Kuartél Jeneral no Unidade Polisia Militár halao viasakra iha Kristu Rei, Dili.
Amu Kapelaun F-FDTL, Kapitaun Rui Filomeno Gomes dehan, viasakra ida nee hanesan jornada fiar nian atu bele reflete no viasakra ida nee kona-ba Jejus ninia terus mate no moris hias.
“Ami halao reflesaun nee kuarezma tomak nia laran, iha kuarezma tomak nia laran nee F-FDTL sira mos iha oportunidade hanesan atu halao retiru, iha mos konfisoens misa nuudar sarani ami halo ida nee, ita hotu iha nee husi Ofisiais Sarjentus Prasas no familia sira nee mesak fiar nain hotu deit neebe ita lao hamutuk hodi halo jornada fiar nian hamutuk ho sarani sira iha mundu tomak,” hatete Amu Kapelaun F-FDTL, Kapitaun Rui Filomeno Gomes ba jornalista sira iha Kristu Rei, Dili, Sesta (11/04/2025).
Nia tenik, signifikadu lo-loos husi viasakra ida nee mak pratikamente no lao hamutuk ho povu Maromak.
“Primeiru hametin liu tan ami nia fiar neebe mak Maromak entrega ba ami maiória katoliku, outru lado ho ami nia esforsu ida nee mos ami buka para afirma povu ninia fiar, ami iha atu fo garantia defeza no seguransa ba povu neebe hakarak hanai Maromak, harii Nai Maromak iha tempu santu ida nee hodi besik daudaun ona ba festa paskua neebe semana oin ita sei selebra,” nia deklara.
Entretantu atividade ida nee sira halao iha nee, husi Kuartél Jenerál, Komponente Aéreo Ligeira, Unidade Polísia Milítar inklui Unidade FALINTIL, Komponente sira seluk halao tuir sira ninia kapasidade no tempu iha idak-idak nia Komponente.
(jen)
