DILI, STLTIMORLESTE.com – Relasiona ho komemorasaun loron FALINTIL ba dala 50, Komando FALITIL-Forsa Defeza Timor Leste (F-FDTL) orienta membru F-FDTL sira halo doasaun raan iha Banco de Sangue hodi oferese ba pasiente sira neebe presiza raan iha Hospital Nasionál Guido Valadares (HNGV).
“Ami kontente tebes, tanba husi Komando F-FDTL haruka nia membru F-FDTL sira mai hodi oferese ona sira nia raan, tanba ita hatene katak raan turuk ida bele salva ema nia vida,” hatete Xefe Interino Banco de Sangue, Maria do Rosário Alves Guterres ba jornalista sira iha salaun Banco de Sangue, Kinta nee (24/07/2025).
Nia dehan, ho atividade doasaun raan ida nee bele ajuda no salva pasiente barak nia vida, tanba iha pasiente neebe baixa iha HNGV persiza tebes raan.
“Ita hatene katak numeru pasiente nian iha HNGV aas tebes-tebes, tanba nee sira persiza duni raan, ho atividade ida nee ita bele hamenus ona numeru pasiente neebe persiza raan,” nia deklara.
Nia esplika, numeru husi membru F-FDTL neebe mai halo doasaun raan nee aas, tanba sira atu realiza atividade komemorasaun loron FALINTIL ba 50.
“Ho atividade komemorasaun neebe sei realiza, membru F-FDTL barak mak mai ona oferese ninia raan no ita haree husi loron 13 too mai agora nee barak ona, hau seidauk sura hamutuk, maibe barak ona,” nia deklara.
Nia informa, atividade doasaun raan nee labele para iha nee deit, maibe tenke iha kontinuasaun nafatin, tanba pasiente ninia desisidade aas liu.
Entretantu observasaun STL nian iha terenu, iha Membru F-FDTL nain 25 mak halo ona doasaun raan no membru F-FDTL sira seluk mos antes nee halo ona doasaun raan, atividade ida nee halao tanba relasaun ho komemorasaun loron FALINTIL ba dala 50 neebe sei realiza iha loron 20 fulan Agostu tinan 2025.
(jen)
