DILI, STLTIMORLESTE.com – Membru FALINTIL – Forsa Defeza Timor Leste (F-FDTL) husi Kuartel Jerál nain 50 resin ba partisipa iha ezerisisiu forsada hodi asegura saúde militar.
“Objetivu husi marsa ida nee tama ona planu matrix anuál Komando F-FDTL nian, marsa forsada nee atu mantein forsa sira nia fizika, mantein operasionalidade forsa nia saude diak nafatin,” hatete Xefe Divuzaun Finansas Komando FALINTIL Forsa Defeza Timor Leste (F-FDTL), Majór Domingos Marques da Costa Freitas ba jornalista sira iha Tasi-Tolu, hafoin marsa forsa nian Sesta nee (12/09/2025).
Nia esplika, marsa forsada neebe membru F-FDTL sira halo nee iha loron Sesta, dia 12 Setembru 2025, tuku 6:00 dader, hahú lao ain ho distansia kilomentru hitu (7) husi área Tibar, Postu Administrativu Bazartete, Munisípiu Likisa, mai iha diresaun foho leten Tibar nian termina iha estatua João Paulo II Tasi-Tolu. Marsa forsada tinan nee halao iha kapitál Dili, posibilidade bele fora husi Dili bainhira hetan orden husi komando.
Marsa forsa neebe Komando F-FDTL halo hahu husi area Tibar mai termina iha area João Paulo II nee partisipa husi membru F-FDTL nain 50 resin.
“Ezersisiu ida nee fahe ba marsa forsada no iha marsa korida, ba marsa forsa nee tuir matrix neebe iha kada fulan tolu dala ida, neebe partisipa husi forsa komponente sira. Ba marsa forsada ohin partisipa husi membru Kuartel Jenerál nain 50 resin no marsa forsa nee obrigatoriu,” nia esplika.
Nia afirma, marsa forsada nee tinan nee halao iha Dili no bele mos fora husi Dili bainhira iha orientasaun husi komando.
Jornalista: Jeniche da Costa
Editora: Xisto Mendonça
