DILI, STLTIMORLESTE.com – Membru FALINTIL-Forsa Defeza Timor Leste (F-FDTL) nain 54 husi Komponente Terestrre remata ona treinamentu kona-ba Operasaun Apoiu Pas nomos navegasaun terestrre iha Sentru Treinamentu Operasaun Apoiu Pas nian iha Metinaro.
Nia dehan, momentu importante ida tan mai Komando F-FDTL, tanba nee remata kursu iha oin tolu, hanesan Navegasaun Terestrre, kursu lideransa nomos Treinamentu Apoiu Pas nian, instrutor sira hanorin nee mai husi Australianu nomós Timoroan sira.
“Horiseik ita ensera treinu final, hau mos akompanha ho komandante CICNL, treinu nee lao diak tebes, treinamentu nee durasaun semana sanulu no navegasaun terrestre mak semana tolu no kursu lideransa, kursu ida nee tempu naruk duni tanba semana sanulu kedas, mezmu instrutór sira kolen maibe sira iha vontade nafatin hanorin no fo treinu ita boot sira,” hatete Komandante Forsa Apoiu Jeral F-FDTL, Koronel Celestino Pinto ‘DAELEBA’ ba jornalista sira liu husi nia diskursu iha Metinaro, Dili, Sesta (11/04/2025).
Nia esplika, kursu Navegsaun Terrestre militár nain 10 resin no CTOAP 50 resin, durante kursu sira halao teoria no prátika, ohin sira termina no simu sertifikadu.
Nia hatutan, hakarak hateten deit katak Komando F-FDTL prontu prepara nafatain nia militar sira hahu husi tinan 2017 mai too ohin loron, agora iha ona kompanhia rua resin, kuandu treinu hotu fila fali ba idak-idak nia komponente tenke mantein nafatin treinu ida nee, atu nunee sira labele haluha materia sira nee.
“Prepara ida nee ita atu halo forsa manutensaun pas nian, agora ita seidauk iha misaun maibe ita prepara antes molok ita nia nasaun presiza ou nasaun seluk presiza ita nia apoiu ita preparadu ona, husu ba ita boot sira nee hanesan bukae ida, fila fali ba imi nia komponente labele haluha liu-liu hanesan Komandante kompanhia, seksaun no eskuadra sira, mezmu ita la ba manutensaun pas mos ita tenke kontinua treinu nafatin,” nia informa.
Iha fatin hanesan, Komandante Sentru Instrusaun Komandante Nicolao Lobato, Tenente Koronel Eugenio Guterres “TOFA” deklara, dala ida tan parabéns ba sira ohin remata ona treinamentu ida nee, hanesan Navegasaun Terrestre no Apoiu Pas nian, nee importante tebes ba membru sira neebe mak ohin remata formasaun ida nee, oinsa para atu utiliza busula sira nee, GPS no kordenadas sira, nee mak navegasaun terrestre nee importante.
” Sentru Treinamentu Apoiu Pas baibain ita sempre rona beibeik mensajen husi ita nia Komando katak, ita tenke planeamentu diak ida relasiona ho Sentru Treinamentu Apoiu Pas neebe agora daudaun ita prepara, materia sira neebe ita boot sira aprende, aban bainrua sei aplika iha misaun neebe mak ita halao, kuando ita prontu ona kondisaun diak ona ita nia estadu apoiu ita, ita mos bele ba ona kumpri misaun,” nia deklara.
Tenente Koronel Eugenio Guterres fo mensajen ba membru F-FDTL, karik fila fali ba sira nia komponente tenke asegura didiak sira nia treinamentu materia militar sira neebe aprende. Tanba moto iha CICNL neeba nee hakreke katak, “diak liu hasai ita nia kosar iha treinamentu, duke hasai raan iha kombate laran, para evita hasai raan iha kombate, tanba nee Instrussun duro kombate fasil instrusaun fraku kombate difisil”, ida nee mak moto iha CICNL karik atu sai militar neebe diak tenke banati tuir moto ida nee,” nia afirma.
(jen)
