DILI, STLTIMORLESTE.com – Membru Governu hotu-hotu konsentra iha Eskritoriu Episkopal, hodi asina livru kondolensia ba Maktoban Sua Santidade Papa Francisco nian.
Visi Primeiru Ministru Interinu no Ministru Koordenador ba Assuntu Sosiais no Ministru Dezenvolvimentu Rural no Abitasaun Komunitaria, Mariano Assanami Sabino hatete, iha Konselhu Ministru dekreta ona pontu importante rua neebe mak iha, halo dezlutu ka lutu nasional no bandeira iha riin klaran durante loron hitu.
“Ohin ami iha ona konselhu Ministru dekreta ona pontu rua importante neebe mak iha, ita halo dezlutu ka lutu nasional durante loron hitu no bandeira iha riin klaran durante loron hitu, nee hanesan ita nia kondolensia, ita nia respeitu no hakruk, ita nia omenajen ba ita nia Sua Santidade Papa Francisco,” dehan Assanami ba jornalista sira, hafoin remata presta omenajen iha Eskritoriu Episkopal, Lesidere, Dili, Tersa (22/04/2025).
Visi Primeiru Ministru nee husu ba komunidade hotu-hotu neebe iha Dili ba hamutuk iha Lesidere, Maliana hamutuk iha Katedral Maliana no Baukau ba hamutuk iha Katedral Baukau.
“Husu ba komunidade hotu-hotu ita neebe iha Dili mai hamutuk iha Lesidere, Maliana iha Katedral Maliana no iha Baukau iha Katedral Baukau, sei iha reza kanta durante loron hitu nia laran atu fo ita nian omenajen solidariedade ba Sua Santidade Papa Francisco, ita hotu hatene horiseik tuku 6:00 ita rona Amu Papa fila hikas ona ba Aman Maromak nia kadunan santu,” dehan nia.
Nia hatutan, laos igreja Katólika mak lakon maibe mundu tomak lakon lider ida neebe mak promove pas, estabilidade no dignidade umana nian.
“Nee laos deit igreja Katolika mak lakon, maibe mundu tomak lakon lider ida neebe mak promove pas, estabilidade, dignidade umana no defende direitu ema kbiit laek no lian laek, ema sira iha kadeia, defende ema oin-oin neebe mak nia defende politika internasional para orienta kondus lider sira laran atu hakiak pas iha ita idak-idak nia nasaun,” hatete governante nee.
(EST 4)
