DILI, STLTIMORLESTE.com – Membru Parlamentu Nasional liu husi Deputada Cedelizia Faria dos Santos husi Bankada CNRT husu ba Governu atu halo pagamentu ba trabalhador Seguransa Lorosae hamutuk nain 319.
Liafuan nee hatoo husi Deputada Bankada CNRT, Cedelizia Faria dos Santos, husi ba jornalista sira iha Plenaria Parlamentu Nasional (PN), Segunda nee (23/06/2025).
“Hau husu favor ba Visi Ministru, tanba ita boot mak rona ami nia lian lori ba Governu, relasaun ho trabalhador seguransa lorosae, hau hanoin hau nia intervensaun laos hau mak foti maibe deputadu sira barak mak foti ona, primeiru hau husu hanesan nee ita tenke tau konsiderasaun, ami hatene katak problema nee mosu iha tinan 2019, iha VIII Governu nian ukun,” dehan Deputata Cedelizia.
Deputada Cidelezia dehan, konsidera mos ba relatoriu husi Instituisaun Jeral Estadu nian neebe mak hatudu katak iha neeba montante neebe mak Ministeriu Finansa uza atu halo pagamentu ba trabalhador seguransa lorosae ho total hamutuk 319 pesoas.
“Dalan sira nee hatudu hela katak fo vantajen hela para Governu bele halo pagamentu ba Seguransa Lorosae, ami rona informasaun audensia liu ba Ministra dehan sei lori ba Konselhu Ministru atu hetan aprovasaun, neebe ami husu ba Visi Ministru ho ninia apoiu, ami husu favor, tanba ami koalia beibeik ona ba Ministeriu Finansas no Ministeriu Obras Publika (MOP) maibe too agora lao iha fatin deit (jalan ditempat),” katak nian.
Nia dehan, konsidera mos ba rezolusaun Parlamentu Nasional ho numeru 5/2023, ba despaixu husi Primeiru Ministru (PM) Kay Rala Xanana Gusmão, neebe mak orienta ona ba Ministeriu Finansas hodi konsidera ba relatoriu juridiku husi Ministeriu Finansas nian bele uza mekanizsmu.
“Maske problema nee mosu laiha IX Governu ninia ukun maibe sira Timoroan, favor boot ida ita bele tau konsiderasaun, hau koalia ohin aban hau sei koalia nafatin, wainhira menbru governu mai koalia kona-ba ezekusaun primeiru trimestre karik ajenda nee la tau duni aban mos hau sei koalia, fo hela TPC ba visi para fo hatene ba ministeriu rua nee aban mai karik ho resposta kedas kona-ba preokupasaun ida nee,” tenik nia.
Hatan ba kestaun nee, Visi Ministru Asuntu Parlamentar, Aderito Hugo da Costa dehan, Seguransa Lorosae nia dokumentus ida nee nia hetan duni husi Parlamentu no audensia mos ho maluk atus tolu resin nee, iha tinan kotuk aprezenta ona iha konselhu Ministru halo akonpanhamentu despaisa Primeiru Minsistru (PM) ba ona Ministeriu relevante liu-liu ba iha Ministeriu Finansas (MJ).
“Hau sei akonpanha nafatin asuntu ida nee tanba liga ho Timoroan sira atus tolu resin ninia direitu ba senariu sira despeza hira mak sira nia direitu nee iha, senariu lubuk ida neebe sei aprezenta, espera katak Ministeriu Finansas hatene ona senariu saida mak atu halo ba rekonhesimentu ba direitu trabalhador sira no Seguransa Lorosae ninia,” nia hakotu.
(EST 01)
